傳統藝術中心布袋戲DVD

傳統藝術中心有共黃海岱、許王、鍾任壁三位大師出版布袋戲精選DVD，毋閣無李天祿个，無彩。 李大師个演出有錄影出售[tshut-siû]=个真少，卡有凍買著--个干那城市國際電影公司所扑个迄套 「把傳統留下來」四出一phō。

下昏暗，閬雨縫[làng-hōo-phāng]騎oo-tóo-bái去台中車頭對面个五南文化公司。姻四樓歸棧攏塊賣公家出版品，內底袂少好物仔，即站仔閣塊打折，我將頂面所講三位个DVD攏總買落來，黃十五出、許十三出、鍾任八出，三十六出戲，開五千一，真有長[tiông]。

黃大師搬个史豔文，風格佮姻公子黃俊雄早期野台、內台个史豔文，閣佮黃俊雄後來佇電視个史豔文各樣[koh-iūnn]，遮先無講彼。僅僅[kīn-kīn]引一站對白，將重點囥踮我卡關心个台語、台文方面。

黃海岱大師口白

史：「住咧！夜行到此，非奸即盜。汝甚麼儂？」[tsū--leh, iā-hîng# tò-tshú# hui# kan# tsik tō# lí sím-mih lâng#]（注意「非」唸本調）

賊：「免問！汝雲州史豔文是無？」[bián mn̄g# lí# hûn-tsiu# sú-iām-bûn# sī--bô]

史：「然也。」[jiân--iá]

賊：「哈哈！卜來捾汝个首級。」[hah-hah21 beh lâi kuānn lí ê siú-kip#]

台語口白「捾汝个首級」vs華文字幕「割你的首級」

「捾汝个首級」字幕寫做「割你的首級」。kuānn變做小可倚音个kuah，彼氣口著無共矣。講「割」，是直接表達用刀用劍tsuî頷頸个動作。講「捾」，卜輸是塊講捾一項物件，但是首級佇儂个身軀頂，卜按怎單獨共捾起來，當然是愛先共割落來。雖是粗殘个鏢客，但是伊塊講話，猶原無講「割」，按呢傷出土[tshut-thóo]；儂是講「捾」，一來卡有曲折[khiok-tsiat]，閣來即款修辭所製造个恐怖氣氛顛倒無卡輸。

這嘛會使另外解說做是刺客[tshí-khik]按呢講，袂輸是共史豔文當做已經儂頭落地个死儂， 伊只是卜來捾儂頭niâ，毋是卜做惡毒。這嘛是一種个曲折。

雖然只是一个幼細个所在，在佇我想，優美个台語文化著愛按呢一點一滴用心共抾轉來。

2023/04/29補充：官話章回小說也時常有寫著「提頭來見」，是欲叫無法度完成任務个儂自殺謝罪。