【潘科元台語文理想國】新站
頭戴台灣天
跤踏台灣地
喙講台灣話
手寫台語文
🏚️ 台語文理想國舊站
十外年前，部落格（英文weblog/blog，也叫做網誌[bāng-tsì]）當興[tng hing]， 我也去中華電信推出个部落格服務站 blog.xuite.net 開設三本日誌： 【潘科元台語文理想國】、【話蕪落、話毋落、話舞落】、【蟫魚个手摺簿仔】。
舊站三本日誌个 taglines
「台語文理想國」个「日誌敍述」(tagline)是：
托[thuh]一塊 khih-kak hâm-sau 个粗 huî 缽[puah]，四界 kâng 分个台語乞士[khit-sū] 所寫个雜糙文
「話蕪落」个日誌敍述是：
抾句讀[khioh kù-tāu]，練台語。潘科元另外一个網誌。PHUANN Khoguan’s yet another Taiwanese weblog.
「蟫魚」个日誌敍述是：
Tsián-hî ê tshiú-tsih-phōo-á: 潘科元讀冊小記。
佇舊站个 m̄-tsiânn 成果
對 2006 年 4 月 24 號到今，我佇「理想國」 鋪出 947 篇文字，佇「話蕪落」鋪出 37 篇文， 佇「蟫魚」鋪出 27 篇，計共 1011 篇文字。差不多攏是寫台語文，有幾篇仔寫華文， 也是咧討論台語文个問題。
😿 xuite.net 宣布收擔
因為新型態个社群網站興起，像面冊(Facebook)、Instagram、Line，將群眾攏吸引過去， 舊型个部落格漸漸少儂愛用，xuite 到今年2023也經營袂落去，公告講欲關站矣。 我著緊揣所在將遐个「家己褒，袂臭臊」个文章攏搬徙出去。
🪺 揣所在徙岫
本來欲將理想國新站徙去我早就有設--个，佇 khoguan.blogspot.com 个網誌， 過程中有拄著一寡限制，像講伊無容允用戶一日上傳超過50篇文，閣有各種無利便。
佇面冊看著巷仔內个朋友 Pektiong 兄相報，講會使利用 Github Pages。 我研究、試用了感覺袂䆀，就是各位目睭前看著个即个站。
🏡 用 Github Pages 囥我个網誌
Github Pages 適合有程式編寫、網站設計个概念个儂使用。踮家己个電腦安裝 Jekyll 程式套件，配合佛心人士提供个免費網站主題(theme)，建置[kiàn-tì] 規套網站，上傳去雲頂个 Github 口座同步，Github 會接手自動替咱建構(build) 佮發布(publish)出來。
Github Pages + Jekyll 所建置出來个網站，也具備 PWA (Progressive Web Application)个功能，予使用者下載來家己个電腦、手機仔，變成一个 App， 予咱个網誌个愛護者閣較方便來收讀。
建置本站个技術細節，請參考我佇本站个Github repo所寫个 README。
☕️ 討咖啡
各位若感覺本站个文章對恁有路用，有歡喜助贈[tsōo-tsān]小弟繼續寫落去， 台灣地區个朋友會通劃撥來寄付。直接去郵局櫃台劃撥，抑是電腦上網 「郵局網路ATM」，抑是透過手機仔「行動郵局」App （「行動郵局」安裝網址），攏會用得。感恩！🤗
郵局劃撥帳號：12403501
戶名：潘科元
若是海外个朋友，有「非台灣」个 Paypal 口座抑是信用卡，就會使得利用 ko-fi.com 个服務來支持小弟，金額單位是美金，勞力！請點下面个鈕仔：
