提案
台羅記寫日語借詞，對應「え段音+ん、え段音+っ」毋通寫 ian、iat，應該另外寫做 en、et。相關的外來詞錄音也應該配合來重錄，毋通唸出 i 介音。
提案人：潘科元
背景說明
舊教典外來詞的寫法：ian/iat + 五調階數字
舊教典「外來詞」附錄，攏用數字標記實調，無用台羅正式版的閏號式調號，而且咧記寫日語借詞的時，對應日語「え段音+ん、え段音+っ」是採用 ian、iat 的拼法。像 ian35 jin51（日語 エンジン ＜ 英語 engine）、oo33 lian51（日語 おでん）、siat50 tooh30（日語 セット ＜ 英語 set）。
台語朗讀稿外來詞拼寫原則（試行版）：en/et + 反推本調的調號
後來因為全國語文賽台語朗讀稿內底加減會出現外來詞，若繼續採用舊教典附錄這種數字式記寫法就無成「文字」，所以 2020 年 5 月有公告一份台語朗讀稿適用的「外來詞拼寫原則（試行版）」，除了採用「反推本調」的方式將聲調數字改標做調號以外，這份文件的第三條也針對外來詞，另外設立 en / et 韻母，條文內容如下：
三、音節「ian、iat」在實際口語中，有「en、et」之變體，但不影響辨義，故臺羅以「ian、iat」標註之。但部份外來詞僅有「en、et」之讀法，無原始形式的念法，則可逕以「en、et」標註。如：e̋n-jín、se̋n-sé、set-tooh。
針對朗讀稿外來詞拼寫原則試行版的修訂意見
後來有委員提出異議，𪜶的主張，大意如下：
第三條講『僅有「en、et」之讀法，無原始形式的念法，則可逕以「en、et」標註』，按呢毋著，因為確實有老大人毋是講 e̋n-jín，是講 ie̋n-jín，𪜶毋是講 se̋n-sé，𪜶是講 sie̋n-sé。也就是講，純台語的 ian / iat 韻母，有 ien / iet、en / et 等等的變體；若是外來詞的 en / et 韻母仝款也有 ien / iet、en / et 等等的變體，既然按呢，就無必要閣分兩組韻母拼法（正台語用 ian / iat，外來詞用 en / et），應該寫做一種 ian / iat 就好，予無仝腔口的人照家己慣勢的呼音去讀。
新教典外來詞的寫法：ian/iat + 反推本調的調號
頭前个新意見，新版教典已經實施，將舊版教典外來詞的數字標調改做反推本調的調號，一方面閣維持舊版外來詞 ian / iat 的韻母拼法，寫做 ia̋n-jín、oo-lián、siat-tooh 等等。舊教典的外來詞無示範錄音，今新版教典也加上錄音矣。
本提案欲修改的寫法：en/et + 反推本調的調號
阮主張：頂面有關的日語借詞，應該採用 en / et 的韻母拼法，來佮「正台語」的 ian / iat 韻母有所區別。以下詳細說明理由。
四大理由
理由一：兩組韻母的語源無仝
外來詞寫 en / et，主要是因為語源本底就無 i 介音，像頂面的例： エンジン 的 エン、せんせい 的 せん、セット 的 セ。啊正台語寫 ian / iat，是因為伊的源頭，也就是古閩南話，確實有 i 介音（雖然現代台語多數人已經失落 i，變做 en/et）。這兩組韻母，用無仝拼寫法，會用得清楚反映出無仝的語源。
理由二：兩組韻母佇音位上有對立（對一部份人來講）
針對正台語的 ian / iat 佮來自日語借詞的 en / et 這兩組韻母，現代台語的音值照我的觀察會使分做三大類的發音人，其中的第二類人，這兩組韻母𪜶有對立關係：
第一類：兩組的音值仝款，攏帶有 i 介音，無音位對立的關係。這類人的腔上保守，像已經過往的布袋戲大師李天祿老先生(1910-1998) 閣像現存一寡仔鹿港的老人就是按呢。我相信這類人是四大類當中比例佔上少的一陣老大人，咱教典委員內底，欲揣這類人恐驚真僫！
第二類：兩組韻母有對立。這類人的年齡層大概比第一類人略仔較少年，有包含一部份老人，閣有一寡仔中年人。𪜶正台語 ian / iat 閣有 i 介音，但是外來詞𪜶會曉講 en / et，無 i 介音。𪜶講正台語「先生」的時，是 sien-sinn/senn，但是𪜶若講來自日語的外來詞「先生」就是 se̋n-sé。這類人比第一類可能較濟。教典一、二十位維護委員當中，就我所知，至少有四位就是屬佇這類。
第三類：兩組韻母無對立。𪜶的正台語 ian / iat 佮外來語 en / et 無分，而且攏無 i 介音矣。我相信這類人佔台語人的絕大多數，也是台語演變的大趨勢、主流優勢腔。阮自細漢，對所謂「台灣國語」的特色的認捌，除了聲母無捲舌，閣有華語韻母 ーㄢ 講袂好勢，講做 en。
（除了以上三大類，閣有一種人是兩組韻母的音值無穩定，有時有對立，有時無，這因為無夠系統性、代表性，佇遮會使忽略。）
歸納以上三大類，有兩點小結論：
講外來詞 en / et 韻母有出現 i 介音的，是第一類的老大人爾爾，比例應該真低。
對第一類佮第三類人來講，兩組韻母無對立，免分寫；但是對第二類人來講，因為兩組韻母有對立，就有必要分寫。
理由三：示範錄音的考量
最近推出的新教典毋但將外來詞拼寫做 ia̋n-jín、oo-lián、siat-tooh 等等，而且新配的外來詞錄音攏總採用有 i 介音的唸法。照我頂面的分類，第一、二類台語人唸正台語的 ian/iat 攏有 i 介音，但是連外來語也唸做有介音的 ie̋n-jín、siet-tooh，只賰第一類，是佔極少數的老大人。
教典一向的示範音檔，針對正台語的 ian / iat 韻母，攏是唸有 i 介音的保守腔。但是因為錄音者本身日常所講的台語腔已經無 i 介音矣，伊就用華語的 ーㄢ 韻母的音值來唸台語的 ian。致使學校內的台語教材也好，全國語文賽的台語朗讀也好，逐家攏採用這種無自然的音值。事實我聽著台灣老大人咧講 ian / iat 的時，就準閣有保留介音，𪜶的介音也無像華語 ーㄢ 講甲遐強烈、明顯。
新版教典欲補錄外來詞的示範音檔的時，因為外來詞也寫做 ian / iat，無另外寫做 en /et，所以錄音者就繼續用伊進前咧錄正台語詞 ian / iat 的做法，用華語 ーㄢ 的音值來唸，連外來語也按呢做，這種無符合全台灣各地台語腔的錄音，予社會大眾聽起來會閣較礙虐、歹接受。
理由四：復育台語下一代的考量
目前教典的做法，正台語的 ian / iat 佮外來語的 en / et 兩組韻母無分，台羅攏寫做 ian / iat ，加上教典錄音的示範作用，新一代「人工復育」出來的台語囡仔這兩組𪜶就攏會一律唸做像華語 ーㄢ 遐爾明顯的 i 介音，煞變做比頭前所講第一類「國寶級」台語老人閣較復古去矣！
問題是第一類人主要是因為唸袂出純 en / et，才唸有 i 介音；啊新一代的囡仔真早就開始咧學英語，像 enter / engine / set / setup ，𪜶欲翻頭學講台語 en / et 的音無困難，但是教典目前的台羅符號無分寫，就會害𪜶分無路來。
結論
教典現行做法，正台語 ian / iat 佮外來詞 en / et 無分寫，一律寫做 ian / iat，閣加上示範錄音攏有唸出強烈的 i 介音，按呢會予一般台灣鄉親感覺足礙虐，尤其是對咱的囡仔欲學習「通行、自然的台語」非常不利，真無妥當。阮懇切建議著愛分寫，外來詞相關的錄音也著重錄才好。
Comments powered by Disqus.