一、貴君个電腦若袂凍完整顯示台語羅馬字，包括教會羅馬字（簡稱教羅）佮教育部公告个台灣羅馬字（簡稱台羅），特別是第八聲，親像「真好食 tsin hó-tsia̍h」，若是恁看袂著迄个第八聲，佇 a 頂頭有一短徛个調號，按呢著愛安裝以下我所收集个字型：
https://dl.dropboxusercontent.com/u/36051377/nngthe/taigi-nngthe/00/tailo-jihing.zip
將檔案掠落來，點兩下，解壓縮了後，將其中七个 .ttf 字型檔（包含 CharisSIL 普通體、CharisSIL 粗體、CharisSIL 斜體、DoulosSIL、GentiumPlus、twu3 即幾種字型），全選起來，拖入去「控制台->字型」內底就可以。
字型裝好了後，閣裝以下第三點所講个台語輸入法軟體，參考伊个使用說明，就會使得佇文書處理軟體（像 MS Word）內底扑[phah]出台語羅馬字。使用教育部閩南語輸入法扑出台羅符號了後，請會記得將符號反白，閣去 Word 个工具列字型選單遐，選擇正確个台羅字型，也就是頂一段所列个迄幾種字型名稱其中一種，按呢顯示出來个台羅字母佮調號才會好看。
二、貴君个電腦若是袂凍完整顯示台語特殊漢字，親像台語 gâu 个漢字是「𠢕」（上敖下力），台語 tshit-thô 个漢字是「𨑨迌」，第一字是「走馬仔，正爿一个『日』」，第二字是「走馬仔，正爿一个『月』」。請安裝以下个「花園明朝體」，這是日本儂好心製作，免費提供予全世界利用个。怹个官方網站是 http://fonts.jp/hanazono/。目前最新版个字型檔是 http://sourceforge.jp/projects/hanazono-font/downloads/58164/hanazono-20130222.zip/。
將以上字型檔掠落來，點兩下，解壓縮了後，將其中兩个 .ttf 字型檔，全選起來，拖入去「控制台->字型」內底就可以。請注意，另外有 .txt 个說明檔，彼毋通拖入去「控制台->字型」內底哦！了後重開瀏覽器軟體，閣來看我即篇網誌，應該就看會著「𠢕」佮「𨑨迌」。
以上是欲「顯示」別儂个台語文符號，以下是家己欲按怎「輸入」遮个符號，所著用个軟體：
三、若欲扑出台羅，會使下載教育部台語輸入法，請連去即个網頁：http://www.edu.tw/pages/detail.aspx?Node=3683&Page=15638&Index=6&WID=c5ad5187-55ef-4811-8219-e946fe04f725
從中有提供三種作業系統个軟體版本，雖然伊名稱叫做「臺灣閩南語漢字輸入法」，但是除了會使得用台語拼音來扑出漢字，也通[thang]扑出台灣羅馬字。詳情請看伊網頁頂面个「疑難解答」佮軟體所佮个說明書。使用軟體，問題百百款，咱著家己揣說明來看，毋通拄著問題，干焦會曉倚賴[uá-luā]別儂替咱解決，按呢袂赴市。
總是，教育部即套，只適合扑教育部公告个台灣羅馬字，無適合扑教會羅馬字，若欲兼顧即兩套羅馬字，會使下載安裝「信望愛台語客語輸入法」。伊毋但會使扑台羅佮教羅，甚至兼顧台語佮客語。
信望愛台語客語輸入法有提供 Windows 版佮 Mac 版，Windows 版閣分 32 位元佮 64 位元版。即套輸入法，也會使扑台語漢字，若是汝欲愛个台語漢字，伊一時無收著，也會使家己加添[ke-thinn]。
四、欲扑出台語漢字，頂面第三大項所列个軟體攏會用得。另外，若有學過「拆字數」迄類个輸入法，像「倉頡、嘸蝦米、大易、行列……」遮个，當然攏會使得用這來扑台語漢字。像我本身就是用「嘸蝦米」輸入法。有時，較奇巧个台語漢字，伊無收著，但是「嘸蝦米」有提供「使用者加字詞」个功能，只要一遍工，以後就攏扑會出來矣。
（下面是 2014-01-15 補充）
五、若是使用智慧型手機仔、平板電腦，現此時限制較大。若是用 Android 系統，我無用，無清楚。有一位法國青年 Pierre Magistry 當咧開發一套台語輸入法 app，若有用過个友志，才請恁分享心得。若是用 iOS 系統，親像 iPhone、iPad，直接佇英文輸入法个母音字母頂面，指頭仔揤咧勿放，過一下仔，伊就會跳出一寡有加調號个母音表予咱選，但是其實彼是針對歐文所設計个 diacritic marks，並無所有个台語調號，像第八聲當然無，ḿ m̀ m̂ m̄ 遮个嘛無，所以扑出來个台羅、教羅袂完整。
以下適合電腦內行儂看，若毋是，請跳過。
以下說明，適用佇 iOS 6，上新个 iOS 7 我無，所以毋知影。若會曉相當个電腦技術，有才調家己動手 jailbreak（jb、破監 phuà-kann）汝个機仔，破監了後，會使利用 iFile app 去修改 iPhone/iPad 个系統檔案內底，英文字母个扑字對照表（字盤表）：
/System/Library/TextInput/TextInput_en.bundle/Keyboard-en.plist
詳情參考英文資料 CUSTOMIZATION OF IOS KEYBOARD [TIP]，佇即篇文章，伊是叫儂直接佇 iPhone/iPad 頂面，利用 iFile 所提供个「純文字檢視器」(Text Viewer) ，將咱欲愛个符號補添入去字盤表內底，問題是咱就是無法度佇 iPhone 扑出遮个台羅，欲按怎補？只好一个仔一个符號，對別位 copy 過去，按呢就費氣啦。
我是將 Keyboard-en.plist 先備份改名，才共伊掠過來 Mac 頂面，利用 Property List Editor 來改（即个軟體包含佇 Apple 提供个開發軟體 Xcode 內面，愛另外裝才有），因為我佇 Mac 已經有先裝台羅輸入法，所以會使真方便直接佇 Property List Editor 補添台羅有掛調號个母音入去。
即个是我做便个 Keyboard-en.plist，提供予儂下載，掠落去，取代 /System/Library/TextInput/TextInput_en.bundle/Keyboard-en.plist
就可以。
但是千萬請注意，我單純好意分享，無收汝一占錢，萬不一汝个機仔因為按呢發生任何問題，我一概無負責。
若是欲踮 iPhone/iPad 扑台語漢字，無「破監」个儂，請利用「繁體中文手寫輸入法」，但是有寡台語字伊無收，所以愛改用羅馬字代替，有个台語字，像「个」著愛切過去「簡體中文手寫輸入法」才扑會出，較麻煩。（2015-09-18 補註：新版个 iOS 繁體中文手寫輸入法，已經會認得「个」--字囉。）
若會曉「倉頡」[Tshong-khiat]輸入法，就用 iOS 內建个倉頡來扑台語漢字，真簡單。
我用嘸蝦米輸入法，是破監了後，另外安裝 百度 iOS 輸入法，閣掠嘸蝦米輸入法表格鬥入去用。
Comments powered by Disqus.