【名刺 bîng-tshì】本是古早漢語，當時个文人、小官欲去拜謁[pài-iat]大官，著愛【持刺 tshî tshì】，也就是雙手提一塊柴牌仔，頂面寫伊个身份、姓名，這塊牌仔就是【刺】，也叫做【名刺】，親像漢朝个壁畫所顯示按呢（相片是林嘉瑩小姐佇長沙簡牘博物館所翕，感謝伊）。名刺後來演變做寫佇紙裡。
寫姓名用來交陪个紙單，現代華語早就改講【名片】，台語古早是講【片單 phiàn-tuann、片紅 phiàn-hông、紅片 âng-phiàn、名片 bîng/miâ-phiân】 ，【片】字佇遮本來攏唸文言音 phiàn，戰後才較捷講做 miâ-phìnn。
講【片紅 phiàn-hông、紅片 âng-phiàn】就是因為愛用好吉兆个紅紙來寫，迄種紙，叫做【丹紅 tan-hông】。較隆重个場合，會另外準備桃紅色个紅片[âng-phiàn]，叫做【桃紅片 thô-âng-phiàn】。
杜嘉德牧師佇廈門所編，1873年出版个廈英大辭典並無收 bîng-tshì，但是巴克禮牧師佇台灣所編，1923年出版个廈英大辭典補編就有收，1932台日大辭典也有收，註明是日語來个。
這是因為日文一直有沿用漢文【名刺】（唸音讀 めいし），台語儂才吸收著即个詞，所以雖然伊个源頭是古漢語，但是猶原應該認定做是對日文來个外來語。而且台灣儂所用个名刺，也改像日本儂用白紙來印，無忌剋[khī-khik]，所以【片紅、紅片】即種名漸漸就無合用矣。
拄開始，台灣儂吸收【名刺】即个詞，是照字唸台語文言音 bîng-tshì，後來才愈來愈濟儂學日語發音，講做 meh-sih。當今真濟儂袂曉 bîng-tshì 个講法，干焦知影 meh-sih，其實是仝一个詞个無仝唸法。
bîng-tshì 有變音做 bîng-tsì / bîng-tsìnn；meh-sih 有變音做 meh-tsih / mé-tsih。
bîng-tsì 个講法，佇戰前个台語文獻揣無，佇1959年12月教會白話字雜誌【Ka-têng ê Pêng-iú】（家庭个朋友）第22期有出現。照我推測，這是【名刺 bîng-tshì】即个外來新詞佇傳播个過程，一部份个台語儂聽音辨義，無法度連結 tshì 即个音佮【名片】个意義，不知不覺煞理解做倚音个【誌 tsì】--字，這是台語固有个詞素，像【日誌 ji̍t-tsì】是解說做記載日子个紙，按呢【名誌】就是記載姓名个紙。
所以我才佇頂兩段講 bîng-tsì 是 bîng-tshì 个變音，總--是，這毋是單純个音韻變遷，有牽涉著詞素意義个影響因素。抑若 bîng-tsì 進一步變 bîng-tsìnn，才是單純个音變，後字受前字鼻音韻尾个同化作用，也帶鼻母音。
即種日語漢文外來語發生【本土詞素轉換】个現象，也發生佇【卒業 tsut-gia̍p】即个詞，因為【卒】佇台語口語詞素無用來表示【結束】个意思，所以有真濟台語儂不知不覺將伊轉換做倚音个固有詞素【出】，變成【出業 tshut-gia̍p】。我捌統計教會公報佇無仝年代出現 tsut-gia̍p、tshut-gia̍p 即兩詞个頻率，會得通支持即種解說。詳情參考拙文〈台語類義詞「出學、卒業、出業、畢業」个歷史演化〉。
若單純用語音來看，bîng-tshì 變 bîng-tsì 是 tsh 變 ts；但是 tsut-gia̍p 變 tshut-gia̍p 是 ts 變 tsh，咱若無考慮詞素个影響力，只好凊彩講一句「送氣音佮不送氣音聲母之間會用得變過來變過去，橫直攏是一種走音」，按呢就得袂著較媠氣个理論解說。
補充：【片】--字用佇名詞唸文音个例，閣有【鴉片 a-phiàn】、【香片 hiang-phiàn】。
以下即張相片頂面个台語火星文【妹吉】顯示出【名刺 meh-sih】變音做 mé-tsih，佇台灣民間真普遍， 連做名片个業者也有按呢講。
Comments powered by Disqus.