台語 kì-liām 是「記念」，毋是「紀念」

台語咧講「手環予汝留咧做 kì-liām」，意思是「記佇心肝內咧數念[siàu-liām]」，毋是華語「紀念」迄个「紀 kí」，著愛寫做「記念」，這是自古就有个台語在來詞，漢文日語詞也是寫「記念」。

「記」古音是去聲、「紀」古音是上聲，無共音。北京話錯亂去，將「紀 ㄐーˇ」唸做去聲ㄐーˋ，變做佮「記」共音。但是台語猶原正確保存，「記」是去聲 kì；「紀」是上聲 kí。親像「年紀 nî-kí」、「紀元 kí-guân」（「紀」佇頭前，愛轉調做第一聲）。「紀」若做十二年个單位詞咧用，普遍唸做聲母有送氣个 khí，親像「我佮伊攏相[siùnn]兔，毋過差一紀年[tsi̍t-khí-nî]」。台灣華語講〔差一輪〕，是卡無文化个講法。

「紀」做字姓（儂个姓），猶原唸做 kí，掛後壁个名做伙唸，愛轉調做第一聲，蓋濟儂毋捌，予華語个錯誤拖累去，烏白唸。華語个走音已經因為儂儂攏錯，約定俗成變做標準音。但是台語愛堅持家治个正確佮系統个一致，「年紀 nî-kí」毋是 nî-kì。唸做 kì-liām，台語文愛寫「記念」。若唸做 kí-liām，才寫做「紀念」，這現代台語無按呢講，但是巴克禮牧師廈英大辭典補編有收，教阮漢文个福建漳州莊先生也有講。

共款，咱講 kì-lo̍k/lio̍k，是「記錄」，毋是「紀錄 kí-lo̍k/lio̍k」。

話講倒轉，現時啥乜「某某紀念館」攏是照華語个寫法，咱唸 kì-liām-kuán 是一種「訓讀」[hùn-tho̍k]，毋是咧唸迄个「紀」--字个台語音。