單身中年个一刻仔幸福

半暝枵饑，掀開電鍋，閣偆半碗白飯保溫--椆。用湯匙仔kueh--一下，坩底小可仔堅粃，thîn寡燒滾水落去，閣ué半小匙仔nóo-lih醬，lā-lā puān-puān咧，一喙紲一喙pe-pe哺哺食了了。坐--遐，吐一个氣，戇神戇神bah-bún笑一下。扑算，這著是一个單身中年會凍有个一刻仔幸福啦乎？

是講，出外儂，無分年紀，咁毋是攏按呢？這欲按怎獨獨通成做是我即號儂个幸福咧。總是，到即款人生个坎站來－－愛情，kin-tu是一箍痟查埔起色迷就失站節；婚姻，關屬是兩尾烏肚蟲仔相倚傍[sio uá-pn̄g]咧交纏尾。著準情欲个束縛暫時通卸一邊，猶原閣拖thuī一个袂堪得枵寒餓[iau-kuânn-gō]个儂殼佇咧。

……

想想咧，安搭一下仔喙空，無算是我个幸福。通算是幸福个，是消風个元氣，一時間閣再灌入來，好通維持心智个運作，寫幾字仔共一生交帶一寡今仔日koh樣个經驗佮想法。