媠氣台灣話「暗靜 àm-tsēnn」(062) 作者：潘科元

媠氣台灣話「暗靜 àm-tsēnn」(062)

解說：
暗靜[àm-tsēnn/tsīnn]，副詞，意思是暗中進行，無愛引起別儂注意。「靜」唸 tsēnn 是漳腔白話音，唸 tsīnn 是泉、廈腔白話音，當今較少儂知影即字有白話音，干焦知有 tsīng，彼是文言音。

文例 1：關重个暗號予迄个透仔提過手，伊緊暗靜摃電轉去報怹祖國知機。

（Kuan-tiōng ê àm-hō hōo hit-ê thàu-á the̍h kuè-tshiú, i kín àm-tsīnn kòng-tiān tńg-khì pò in tsóo-kok tsai-ki.）

註跤：關重，關鍵[kuan-kiān]、要緊个意思。透仔，就是 su-pái（英文 spy）、細作[sè-tsoh]、爪耙仔。摃電，扑電報。

文例 2：菩提老祖攑戒尺，佇悟空頭殼頂扑三下，了後雙手揜後，行入內頭，閂中門，共眾徒弟放--咧做伊去。悟空被扑閣予師兄弟罵，iá是笑微微，因為伊知影師父是咧點拄伊，愛伊今暝三更，暗靜行後門去揣師父傳授祕法。

（Phôo-thê Nóo-tsóo gia̍h kài-tshioh, tī Ngōo-khong thâu-khak_tíng phah sann-ē, liáu-āu siang-tshiú iap-āu, kiânn-ji̍p lāi-thâu, tshuànn tiong-mn̂g, kā tsìng tôo-tē pàng--leh tsò i khì. Ngōo-khong pī phah, koh hōo sai-hiann-tī mē, iá sī tshiò-bi-bi, in-uī i tsai-iánn sai-hū sī leh tiám-tuh--i, ài i kim-mê sann-kenn, àm-tsēnn kiânn āu-mn̂g, khì tshuē sai-hū thuân-siū pì-huat.）

相關詞：暗中、揜貼[iap-thiap]。

© 潘科元 2013 版權所有．敬請賜教