「老師」即个詞雖然台語本來就有，但是毋是當做任何「教師」个通稱，是一種真有地位个教師，親像清朝時代府學[hú-o̍h]、縣學[kuān-o̍h]个總教師，抑是其他个時陣特別个尊稱所用，而且是唸文言音 nóo-su（泉腔）、ló-su（漳、廈腔）。
所以，佇台北大龍峒个陳悅記[Tân Ia̍t-kì]祖厝，予儂尊稱做「老師府 Nóo-su-hú」來記念陳維英 迂谷先生，陳先生毋是普通个 teacher，伊做過「內閣中書」个官，名義上就是咸豐帝个老師[nóo-su]，伊閣創辦噶瑪蘭仰山書院，也擔任艋舺學海書院院長。
總--是，若是一般學堂[o̍h-tn̂g]个教學先生[kà-o̍h-sian-sinn]，學生攏叫伊「先生」，理論上來講，「先生」無限定男女，實際上古早較罕得有女性做先生。現代女老師比男老師較濟，我一个小妹真古錐，教學生囡仔台語課，叫怹著照古例稱呼伊「先生」。
「先生」即个詞是「文白濫」，前字取文言音，後字取白話音，唸做 sian-sinn，這是泉腔，若是漳腔講 sin-senn。但是也有「漳泉濫」，前字取泉腔，後字取漳腔，變做 sian-senn，閣有一寡儂是唸做 sin-sinn。
不而過，「先生」个範圍較闊，有醫術會救儂命个，咱嘛叫伊「先生」；有學問智慧，會替儂解決人生大問題个𠢕儂也是「先生」。進一步，佇社會佮儂 tsih-tsiap，對任何一个體面个男性大儂表示客氣，攏通叫伊「先生」。
頭前無姓个「先生」稱呼，就照一般變調法去講，「先」變調、「生」本調。當然「先生」頭前嘛會使加「姓」，像「張--先生」，即陣姓唸本調，「先生」著愛變唸輕聲；「先生」頭前也會使加「名」抑是「別號」，「兩字名+先生」即種結構个「先生」就無唸輕聲，閣照一般變調法。抑「兩字名」个前字唸變調，尾字有儂佮意唸本調，有儂慣勢唸變調，愈捷叫，就愈容易唸變調，變成只有最後迄字「生」唸本調，前三字攏變調，台語變調佇遮無絕對唯一个規則。
扑算是戰後受華語影響，「老師」變做一般教師个通稱，即種用法个「老師」，六、七十年來，逐家慣勢講做 lāu-su，前字「老」唸白話音 lāu、後字「師」唸文言音 su。
有寡台語先覺主張通稱用法个「老師」也著唸全文言音 nóo-su / ló-su 才有合理，因為 nóo-su 無一定 lāu，嘛有少年个。
在我土想，照約定俗成个用法，自然來用就可以。一般性个職業稱呼，咱就講 lāu-su。若是欲表現特別正式，尊敬伊个地位抑是學問，才用文言音 nóo-su。按呢予台語較幼路，較有風格个變化。親像有時咱感覺當面叫一位大學問家「大師 tāi-su」，對方凡勢仔會無歡喜，按呢咱通叫伊 nóo-su。
文例1：我將來想欲做老師。
[Guá tsiong-lâi siūnn-beh tsò lāu-su.]
文例2：怹後生師範畢業了後，就志願去山頂做國校个老師。
[In hāu-senn su-huān pit-gia̍p liáu-āu, tsiū tsì-guān khì suann-tíng tsò kok-hāu ê lāu-su.]
文例3：今仔日我欲紹介寫出即篇通俗論文个老師，伊無求名利，但是伊个學問比十个教授加起來閣較飽。
[Kin-ná-ji̍t guá beh siāu-kài siá tshut tsit-phinn thong-sio̍k lūn-bûn ê nóo-su, i bô kiû bîng-lī, tān-sī i ê ha̍k-būn pí sann-ê kàu-siū ka--khí-lâi koh-khah pá.]
上課个時，學生欲叫我 sian-sinn，抑是 nóo-su、lāu-su，我攏歡喜接受。
Comments powered by Disqus.