媠氣台灣話「花血 hue-hiat」(033) 作者：潘科元

媠氣台灣話「花血 hue-hiat」(033)

解說：花血[hue-hiat]，形容物件个花色豔麗，抑是婦人儂嬌姿美豔[kiau-tsu bí-iām]。有時有負面評價。（漢字暫時採用台日大辭典寫法。）

文例1：查某囝講校慶个時，怹社團欲搬一齣青春悲喜舞台劇，媽媽撥工去剪一塊較花血个綢仔布來共伊做服裝。

（Tsa-bóo-kiánn kóng hāu-khìng ê sî, siā-thuân beh puann tsi̍t-tshut tshing-tshun pi-hí bú-tâi-kio̍k/ki̍k, ma-ma puah-kang khì tsián tsi̍t-tè khah hue-hiat ê tiû-á-pòo lâi kā i tsò ho̍k-tsong.）

文例2：有一个枝骨挑俍、打扮花血个小姐遠遠對遐來。辦公室个儂，聽著 kho̍k、kho̍k、kho̍k 个懸搭聲，閣鼻著芳貢貢个粉味，逐个攏攑頭掠伊金金看。

（Ū tsi̍t-ê ki-kut thiau-lāng, tánn-pān hue-hiat ê sió-tsiá hn̄g-hn̄g tuì hia lâi. Pān-kong-sik ê lâng, thiann tio̍h kho̍k, kho̍k, kho̍k ê kuân-tah-siann, koh phīnn tio̍h phang-kòng-kòng ê hún-bī, ta̍k-ê lông gia̍h-thâu lia̍h i kim-kim khuànn.）

註跤：枝骨挑俍，類似華語〔身材高挑〕。懸搭聲，懸搭鞋（高跟鞋）个聲。

相關詞：嬌色[kiau-sik]（指色緻嬌豔）、妖嬌[iau-kiau]、豔冶[iām-iá]、嬌姿絕色[kiau-tsu tsua̍t-sik]。

© 潘科元 2013 版權所有