媠氣台灣話「頭家媽 thâu-ke-má」(068)

媠氣台灣話「頭家媽 thâu-ke-má」(068) 作者：潘科元

台語「頭家 thâu-ke」就是佇家內[ke-lāi]做頭个儂，引申指各種農工商事業个主儂。

早前个社會，講著「頭家」，咱心目中出現个形象大概攏是查埔儂；若是頭家个家後，就叫伊「頭家娘 thâu-ke-niû」。辛勞會對外儂講起「阮頭家」、「阮頭--个」，但是婦人儂提起家己个翁婿，嘛定定按呢講，聽起來比講「阮翁[ang]」較體面[thé-biān]。

所以台語「頭家」有時指主儂，有時指翁婿。日文「主人しゅじん」嘛是包含即兩種用法。

開店个頭家，就是「店頭家」；有厝 稅--儂个，就是「厝頭家」（華語〔房東〕）。

平平寫做漢字「娘」，台語有幼路个發音分別，有時講 niû，有時講 niâ。若講 niâ，攏是指老母，像「阿娘 a-niâ、俺娘 án-niâ」；若講 niû，用路較闊，少年女性是「姑娘 koo-niû、小娘 sió-niû（時常用佇情歌）」，牽手是「娘囝 niû-kiánn」，頭家个牽手是「頭家娘」。

女性个通稱，除了講「查某儂、婦人儂[hū-jîn-lâng]」，也有講「姿娘 tsu-niû、姿娘儂」，可惜即个雅氣个詞，佇台灣差不多廢無去啦，已經罕得有儂用。

俗語「三分姿娘，七分打扮」[Sann-hun tsu-niû, tshit-hun tánn-pān]，即句咱通閣定定提起來餾。現代女性个化妝（閣有修圖^^）技術，閣較加強即句古早話个正確性。

若是講 a-niâ，一律是咧叫老母。但是講 a-niû，台日大辭典收三種定義：子女稱呼老母、查某𡢃稱呼主娘[tsú-niû]（主婦）、男女相褒情歌內底咧稱呼女方。第三種定義，值得咱現代儂抾轉來用。

現代社會，男女愈來愈平等，女性家己開店、創業个真濟。按呢欲按怎叫伊？有幾種做法，一種是認為既然男女平等，所以用語嘛著平等，無分男女，只要是伊做主咧經營，就叫伊「頭家」。閣一種做法，就是將「頭家娘」加一項定義，指女性个頭家。萬一若拄著有儂認定「頭家娘」干焦會使指頭家个某，但是伊是小姐儂家己做頭家，所以無歡喜儂叫伊頭家娘，無，咱就叫伊「頭家姑娘」好囉。

若是頭家个老母，咱按怎叫？台灣華語敢哪無專用个詞，所以就有儂半耍笑叫做〔老闆的娘〕，但是台語自來有一个詞，叫做「頭家媽 thâu-ke-má」，聽起來真親切，但是現代儂晏婚、生少，頭家个老母若猶未做媽[má]，叫伊頭家媽，毋知伊會歡喜接受袂？無，叫伊「頭家-ma-ma」 好囉。

也有友志來回應講，頭家个老爸，怹叫做「頭家公 thâu-ke-kong」。

© 潘科元 2014 版權所有．敬請賜教