我的大英百科狂想曲

《我的大英百科狂想曲》賈各布斯 (A.J. Jacobs)著[tù]；黃芳田 譯。台北：遠流，2006年初版，503頁，包括中英名詞對照附錄。英文原作：The Know-It-All: One Man's Humble Quest to Become the Smartest  Person in the World. 2004.

自從幾年前我看過原文个Harry Potter第一到第四集了後，我就毋捌閣讀過五百頁个中本冊矣。我看冊速度慢，塊過日閣真爻趖[sô]，上食力个是袂主心定[tsú-sim-tiānn]，所致一年讀無幾本冊。

即本冊是一个美國Niu-iok儂將歸套三十二大本个大英百科全書攏總讀完个記錄。伊是一个雜誌社个編輯[phian-tship]，利用下班時間，差不多一工看一百頁个速度，用一年久，讀完三萬三千頁，四千四百萬字个Encyclopaedia Britannica（以下簡稱《大英》）。即款心理能量予儂不止拜服。

大英百科當然是硬piàng-piàng个智識冊，毋閣伊即本記錄寫甲足輕鬆、通俗，歸本冊个氣口是挓智識來塊激肝田[kik-kan-tiân]，嘛親像百科全書个編排按呢，照英文字母个順序，揀出一寡《大英》个條目，佮伊家治个生活自由聯想，講寡五仁[ngó-jîn]話，拄著--仔亦會有出現幾句仔小可有內涵个想法佮引文，毋閣隨時著會轉轉來迄種酸洗[suan-sé]人間嘛酸洗家治，liù-phiù-liù-phiù 个美式幽默[iu-bi̍k]。

上班時間以外，伊毋是干那對《大英》tshàng-thâu-bī，一直硬死讀、做書呆[tsu-tai] niâ。伊佇迄一年內，做過袂少相關个活動，親像去參加高IQ者个協會所辦个聚會、訪問智商百九个儂、khà電話請教捌讀過歸套《大英》个前輩个意見、參加電視「百萬富翁」智識問答節目、拜訪《大英》个總部，上重要个就是做足儕電腦筆記，寫出即本感想集。

雖是按呢，伊猶原表現甲足siâng書呆，因為伊定定佇無適當个都合講出一寡伊讀來个智識，想卜展紅，煞予儂真gê。毋閣，這無定只是伊為著卜予即本冊卡笑詼，刁工寫予卡hàm--个。親像我嘛會佇一寡情境个事後，幻想講我若當場講出啥麼話，會造成[tsiânn]啥款效果。

智識(knowledge)个總和，無等一是智力(intelligence)，智力嘛無等一是智慧(wisdom)。雖是按呢講，伊用一年个性命，從事即號智識个活動，iá是真值得肯定。

附記：「狂想曲」是對洋文 rhapsody 翻譯來个，毋閣「狂想曲」即个詞佇華文世界个譬喻系統內底，已經發展出家治个性命，讀者會使去博客來網路冊店tshiau-tshuē冊名有「狂想曲」个冊有幾本，抑遐个冊涵蓋啥款主題，閣去Amazon揣看有rhapsody个冊是啥麼，就會有概念。另外，即本冊原文名有"quest"即字，彼是西洋文學佮文化中極重要个主題，翻做「追尋」，佇東方文化，相對就卡無迄種力量。