先解說「支那」即个詞。「支那」[Tsi-ná]自早一直是一个中性个名詞。佛經傳來中國，經冊內底有提起東方迄个大國，梵文Cīna(चीन)，古早漢人翻譯佛經著音譯做支那。佛經另外嘛有「中國」即个詞，但是毋是專有名詞咧講China，只是一个普通名詞，意思是文化發達流通，有機會聽著佛法个所在，相對於「邊地」[pian-tē]來講个。咱知影迄陣翻譯佛經，往往有皇帝咧贊助，「支那」个寫法，現拄現有得著漢人皇帝个認可，無共伊當做不敬个用語，若無，無可能容允伊繼續存在。這算是古早漢人一種客觀个學術態度。
日本个佛教是對漢地傳過去个，所以怹嘛有用「支那」即个詞，並無kânn有褒貶[po-pián]个態度。後來，支那予日本扑甲mi-mi-mauh-mauh，對日本个怨恨siat-thái-á深，對日本使用支那即个詞，嘛連帶產生大反感。尤其是支那有「支」--字，望文生義[bōng-bûn sing-gī]，會想著分支、支派、支流，拄好是佮「中心、中柱、中流」个「中」--字意思對反。所以真濟支那儂開始相信予儂稱呼做「支那」，是看怹無目地，刁工欲侮辱怹，見若聽著看著「支那」，著氣phut-phut。怹毋知影支那即个詞，怹家治个祖先已經使用一、兩千年矣。
想一个真，「中」是相對个位置，愛看講話个儂徛佇佗位，迄位著是「中」，汝有汝个「中」，我嘛有我个「中」。所以「中國」本底著是一種自我中心个稱呼。每一个國家，對怹內部个國民來講，當然攏是「中國」。著親像英文，儂儂攏通自稱做 "I"，但是 "I" 雖然大寫，並毋是啥乜專有名詞，干焦某一个儂會凍用，彼只不過是相對个代名詞。雖然咱尊重每一个國家、民族對家治个稱呼，願意照怹家治个稱呼去叫怹，但是使用相對詞來當做家治个專有名詞，勉強別儂著按呢叫怹，有影是卡拗蠻。
但是，親像我一向所主張个，語言个意義來源（語源）並毋是決定語言涵意唯一个根據。語詞个意義，會綴使用者个認定發生微妙个變化。佇台灣即个以漢語系語言為主个所在，長期以來攏使用「中國」來做專有名詞。一方面咱會凍接受即種約定俗成个講法；一方面，咱嘛愛有觀照力[kuan-tsiàu-li̍k]，勿因為伊有「中」--字，煞不知不覺予伊洗腦，認定伊成做咱个「中」。著親像蓋濟無品个台灣藝人，明明是食台灣米、啉台灣水大漢个，怹喙裡所講个「內地」，毋是台灣个南投，煞變做是支那共產黨所界管个一切範圍。連廣州、上海、天津攏總是內地。遐个是支那个沿海，連支那儂家治嘛無講遐是內地[luē-tē]。
紲落去來講支那儂个漚步。俗語講「白白布染甲烏」[pe̍h-pe̍h pòo ní kah oo]、閣講「用無影槍揬--死」[Iōng bô-iánn-tshiunn tu̍h--sí]（請注意，「槍」是唸做 tshiunn）。支那儂欲kâng陷害，慣串用个漚步，著是先共汝設局、創空[siat-kio̍k tshòng-khang]，判汝一个無影無跡[tsiah]个大罪名，紲落去共汝刑罰[hîng-hua̍t]、草踏[tsháu-ta̍h]，種種粗殘个手段凌治[lîng-tī]汝。了後，閣激一个菜公面，假慈悲，講汝罪孽雖重，伊法外開恩，諒情汝，輕輕仔共汝判，叫汝著跪咧謝主隆恩[siā tsú liông-un]，感謝伊个仁德。幾千年來，共款即套漚步个變化、應用，講袂了，說袂盡。
具體明確个例，著是即擺台灣个跆拳道國手楊淑君佇廣州參加亞運，予支那儂佮韓國儂鬥空[tàu-khang]做手，誣賴[bû-luā]冤枉个事件。咱世界一流、清清白白个選手出國比賽受枉屈，毋但是對伊個人上大个傷害，台灣全體个尊嚴佮國格嘛攏盡掃落地。發生即號大代誌，台灣个馬政府，猶原kiu-kiu-kue̍h-kue̍h，無勇氣、無才調出面代表人民，對國際爭取權益，洗清屈辱。干焦會曉叫咱愛吞忍，勿刺激中共，通予馬政府个大小官員繼續穩心仔食清睏宮[tsia̍h-tshing khùn-king]，享受榮華富貴。
馬政府一直自認家治是中國个地方政府，著準是按呢，地方政府个運動選手予中央政府枉屈、草踏[óng-khut tsháu-ta̍h]，伊嘛應該即時出面，大聲替地方討公道。伊無做無打緊，煞閣有國民黨立委欲叫人民家治連署抗議，即種政府勿講無資格代表國家，連做地方政府都無夠格。
支那、韓國所控制个亞跆盟無可能認錯改判。咱个抗議有效果个所在，扑算是佇喝醒閣卡濟个台灣儂，了解家治个處境[tshú-kíng]、堅強自己个心志，看清楚馬政府个軟死汫[nńg-sí-tsiánn]佮不中用[put-tiòng-iōng]。
支那當局遐个漚貨，毋若枉屈[óng-khut]咱，閣咧洗牙[sé-gê]，講本來愛判恁全體攏禁賽，是阮去講情，才干焦罰恁一个儂niā。袂輸是強姦一个儂，了後，閣講：本來愛強姦恁歸家伙才著，是看恁平平是中國儂，才放汝煞，汝著感謝怹。怹自頭至尾，所用个著是我頂峘所講个步數。
最後來講按怎看破支那儂个漚步。伊即套漚步个要點，已經講過了，但是內中个鋩角[mê-kak]不止奧妙[ò-biāu]。咱古意條直个台灣儂，略仔無細膩，著予怹哺食[pōo-tsia̍h]--去，閣毋知是按怎死个。欲按怎對付支那儂即種惡根性？卡長期來看，咱著愛好好仔研究怹个歷史，才卡有法度即時看破怹个跤手。
舉一个例，往過國民黨軍，上蓋tshut-tioh个孫立人[Sng Li̍p-jîn]將軍，長期接受美國式个教育，閣留學美國个軍校。轉來為蔣介石做牛做馬，所立个大功勞是講袂盡。總是伊做人無手腕，傷戇直，得失黃埔系个將領佮蔣經國个政工系統。予怹無事無白創景誣賴伊「窩藏[o-tsông]共匪、密謀犯上」，共伊長期軟禁起來。孫將軍後來用心讀「資治通鑑」[Tsu-tī-thong-kàm]，才怨嘆講，早知影愛讀即phō中國歷史冊，著袂去hông陷害著矣。
著準咱無看迄種正史，加讀寡三國演義小說，亦是不止有效。日本儂欲侵取[tshim-tshú]中國，怹个頭儂，逐个攏精通三國演義。
Comments powered by Disqus.