收著金光黨騙錢電批

前一站仔，捌收著台文界有名个李教授一封英文電批，寫講伊儂佇國外，錢扑毋見，欠所費，欲共咱借錢。即兩工連洪教授嘛發出一模一樣、仝款來容个email。

怹个電批口座，攏予金光魔神仔附身矣。逐家著細膩，毋通佇網路凊彩填寫汝 email 个密碼資料。

但是當今真濟手機仔、平板電腦个 App，欲充份使用，攏愛連結家治信箱、社群網站口座、抑是雲頂空間个口座。第一遍安裝个時，伊攏會叫我提供遮个資料，我真袂放心，毋知影建立行動平台个 Apple、Google 按怎來保障咱个資訊[tsu-sìn]隱私，才袂予遮个 App 開發者 食偷去？

註：詐騙集團，台語叫做「金光黨」，古早个金光黨，著愛面對面佮受害者接觸，利用儂个心理弱點，特別是貪慾，加上邪術來拐--儂。後來个金光黨，改用電話。閣卡進步个，就是透過網路。

即種予汝看袂著影、嘛聽袂著聲，莫明其妙就共汝騙過手个金光黨，我共伊號做「金光魔神仔」，怹佇網路線个電流中，生湠濟濟，四界流竄[liû-tshuàn]，喙仔紅紅，隨時欲食儂。