在我扑算，一兩百冬以來，閩南語、台灣話教會羅馬字演變个大勢面，就是對偏向音值，望進[bāng-tsìn]偏向音位个拼寫法。（讀者若毋捌「音值」、「音位」个差別，請好好仔研究何大安教授寫个《聲韻學中的觀念與方法》前幾章，著會卡有概念）
1873年Douglas牧師做个《廈英大辭典》有分別 ch 佮 ts，ch 配 i/e 元音，ts 配 a/o/o./u 元音，亦著是用 ch 來表現閩南話無送氣塞擦音受著後壁元音發音部位个影響，造成「顎化」(palatalization)个現象。毋閣一點蓋奇，送氣个塞擦音煞干那有一種 chh，並無 tsh，咁講送氣音著袂顎化？另外，「淵、演、燕……」个韻母，伊有兩種記法，ian 佮 ien，伊認為寫 ien 卡好。遮个現拄現是偏向音值个拼寫法。
共一年正式出版个舊版廈門音新約聖經，共款有 ch/ts 兩款符號。毋閣「淵」韻母，伊是寫 ian，毋是 ien。ian 即種韻母，古早閩南語个發展應該是佮官話差不多。韻腹低元音 a 个位置予頭前迄个峘舌位个 i 介音牽挽著，發音部位徙對 e 去，亦著是 ian 變 ien，親像注音符號寫做 ㄧㄢ，ㄧ就是 i, ㄢ就是 an, 但是ㄧㄢ佇「標準國語」毋是唸做 ian，是愛唸做 ien。總是，閣有一寡官話區是講 ian，保留卡古早个音。
扑算佇 1873 迄个年代，閩南話 ian / ien 兩種閣攏有凍聽見，但是 ien 已經卡贏面矣。Douglas才會建議寫 ien，卡接近實際發音个寫法，亦就是偏音值个記法，對外國儂來講，看著符號，直接呼出來，會卡準。但是對在地儂來講，無經過適當个音位化个整理，予符號接近母語儂个語感，在地儂卜學習即套符號著會卡食力。親像 ch/ts 个分立，對在地儂來講，完全無必要，加茹个niâ。就姻个語感，彼是共款个聲母，傳統閩南韻書十五音，無論漳泉，著攏用一个聲母來表示。
符號演化个結果，ch/ts 合做一个 ch；「淵」韻母，變做 ian。即兩種攏是對倚音值，行對倚音位去。巴克禮牧師1885年佇台南創刊个Tâi-oân-hú-siânn Kàu-hōe-pò（〈台灣府城教會報〉）就是按呢寫。
閣來，1913年甘為霖牧師佇台南出个《廈門音新字典》，煞倒翻箍，繼續保持舊版聖經 ch/ts 分開个寫法。總是，彼毋是主流，續後[sio̍k-hiō]無儂綴伊。甘牧師是為卜tsun-tshûn聖經个寫法，無疑巴克禮牧師1916年重譯重出个新版新約聖經，嘛干那一種 ch。新版聖經出來，舊版个廢無去矣，毋知讀者咁知影叨位有塊通看著全文？
ian 變 ien, 紲落來閣進一步變 en，介音lak無--去。到甲即个坎站，符號閣寫做 ian，有影著有卡抽象去矣。阮塊教學，學生對這不止頭疼。明明是一个母音，煞愛寫 ia 兩个符號，唸起來嘛差真儕。若是細漢囡仔，叫姻死記，卡無問題，若是青少年以上个，死記無啥有路來，抑若照以上按呢解說予姻聽，姻一時間閣聽袂tshun-tshia，真費氣。
拼音符號个制定，相當个音位化有好無bái，不而過，若定了過頭抽象，卜推捒予一般欠語言學訓練个民眾使用，就會僫教、歹學。
我毋是卜暗示講，我支持將 ian 寫做 en 就好。若有高明賢達有才調設計一套有應效个教學法，予學生真快學會曉 ian，按呢我真歡喜順趁汝。
Comments powered by Disqus.