「民謠」毋是「民歌」

「民謠」毋是「民歌」，本質無仝！「謠 iâu」，古文獻解說講「曲合樂曰歌，徒歌曰謠」、「歌必有度曲節，謠則但搖曳咏誦之，兒童皆能爲，故有童謠也」。 「徒歌」个意思，毋是單純指無樂器伴奏个「清唱」，伊有一个重要精神就是「無受『樂律』个拘束」，所以「謠」往往無法度完整採譜，用 Do、Re、Mi⋯記落來。

「謠」个本來面目是就咱即種有長短峘低聲調个語言，將伊「牽聲拔調」[khan-siann pue̍h-tiāu]（就是「搖曳咏誦 」），帶有一種韻律感、音樂感，但是無一定有合音樂个音階、音程。

咱台灣正民間自生自發个民謠，上感動我，也是我認為上有價值，但是也上僫得佇現代社會傳承个所在，就是佇咧「抑ná像講話；抑ná像唱歌」迄種直接、素樸來傳達底層人民心聲个「民謠味」。

即種個人風格強烈个「民謠味」無法度用規格化个樂譜來忠實記錄，也無法度佇大量生産、制式化个教室來傳教[kà]。

有心推動民謠个現代智識份子，將「民謠」變做完全合樂律个「民歌」咧傳承，有个是毋捌頂面个道理，有个雖然大概知，但是想無卡好个教學方法。

其實古早讀册儂个「吟詩」嘛是仝款道理，現代煞差不多攏變做「團體照譜唱詩」。