活民謠欲踮教室內傳承个自然教學法

我个淺見－－活民謠欲踮教室內傳承个自然教學法：

一開始先勿[mài]予學生學彈月琴，也免唱 Do、Re、Mi，上好有兩个老師，用相褒對唱个方式示範，才一句一句教學生唱，老師通[thang]用月琴抑是絃仔伴奏，加強學生對迄種曲調个「特徵音型」个熟似度。了後予學生分兩爿來耍[sńg]對唱，才閣兩个兩个一組來練習、互相觀摩。

一種調愛練到十首歌詞以上，逐首攏愛根據歌詞个語言聲調來適當調整旋律，這蓋重要，因為活民謠毋是固定旋律个死歌。七字仔歌詞thap寡虛字、語氣詞是真好，但是像陳達阿伯按呢，自由扑破七字仔个詞組結構，一句七字變做十外字个唱法，無適合初學者模仿。

一个調唱過足濟葩無仝个歌詞了後，台語講會輾轉个學生，家治不知不覺會慢慢體會出「一種曲調無變佮通[thang]變」个所在，「無變」个所在，予儂聽會出這是咧唱啥乜調，發生音樂共鳴；「通變」个所在，是配合歌詞語調來變，予儂聽會出咧唱啥乜內容，才會有思想共鳴。

閣來，老師就可以提新个歌詞，引tshuā學生，予伊家治去發揮、試唱看覓。以上个過程中，老師愛適時加入台語聲調調階个分析、解說，學生若有開竅[khui-khiàu]，大概把握著唱活民謠个訣頭，老師才開始教月琴个自彈自唱。（論到月琴自彈自唱活民謠个要領，這愛閣另外詳細來探討。）

最後，就愛鼓舞、指導學生，家治編詞，唱出家治个人生佮心聲。按呢教室內个民謠教學才算功德圓滿。 

(2012-09-17 facebook)