紅綾袚胛

台日大辭典有收「紅綾拔胛 âng-lîn# phua̍h-kah」，解說是秀才及第个時，用紅色个絲綢phua̍h佇肩頭。（phua̍h，教育部寫做「袚」，親像「袚鍊 phua̍h-liān」，華語講〔項鍊〕。）

下昏暗佇台中樂成宮看戲尾：有儂含冤受屈，後來按君大人查出真犯，替伊洗清冤枉，就共伊「紅綾 phua̍h胛 洗門風」，予伊去遊街，以後就無儂會閣講伊是罪人。原來「紅綾phua̍h胛」也有即種路用喔！

台灣軍隊个值星官[ti̍t-sing kuann] 著愛 phua̍h值星帶[ti̍t-sing-tuà]。因為華語講〔揹值星帶〕，所以我做兵个時，捌聽兵仔伴用台語 phāinn 來講。照頂面个用法，咱知影即个動詞著講「phua̍h」較端的[tuan-tiah]，若「揹 phāinn」應該是揹重重个物件。

實施五十幾冬，phua̍h值星帶个規定，聽講已經佇 2010 年廢除囉。

補充：有先進來賜教，講「揹」是揹重物，感覺佮「擔責任」較倚意。按呢講也真有理，咱也thang分做兩種：講「phāinn值星」指較抽象个責任；若是講「伊第一擺𤆬兵，袂記得phua̍h值星帶」指具體个。

畢業个學生，講伊學著个戲文，王魁有唱「紅綾披胛」。