我大學就會曉倉頡輸入法。做兵个時佇旅部負責扑文件。一擺看著師部个電腦兵，有儂用大易、有儂用嘸蝦米，扑字速度斬然緊，阮倉頡使用者練到死嘛綴袂著。我才趁放連假个時，去買嘸蝦米个冊來練。
一下收假轉去部隊，本來我倉頡扑甲變反射動作，無疑誤煞因為改練嘸蝦米，原底个直覺規个破功，扑回原形，變做佮初學者差不多笨，但是我嘸蝦米閣猶未有夠熟，真慘。佳哉迄時我已經是破月等退伍个老鳥，無啥工課矣。
十幾年來改用嘸蝦米，真慣勢、好用，除了有時軟體較無便，無像完全開放个倉頡，逐台電腦攏有。注音輸入法个一般使用者欲像我扑字遮緊，真罕見。
用即種【拆字素】性質个漢字輸入法，閣一个好--處，就是免予發音束縛，只要學一套，無論扑華文、台語漢字文攏thang用。
其實，我嘸蝦米學了並無徹[thiat]，無好好仔去練進階个【最簡碼】，所以猶原無算專業。
最近共我个 iPad【破監】(jailbreak) 了後，毋但有法度佇 iPad 扑出所有个台語羅馬字調號，也會使得用嘸蝦米。
但是因為是佇螢幕頂面用一支指頭仔點【虛設齒盤】，所以拄著一字愛點四个齒，就感覺傷慢氣、忝頭。即陣，我才閣翻頭去研究嘸蝦米个簡速扑法。
舉例：【牽手護台灣】，若是照嘸蝦米基本規則，著扑 lwns hj irvu uoo wsiq 攏共 17 碼才走會出迄五字。若是用【最簡碼】，但使[nā-sái] 扑 ls hj iu uo wq 總共 10 碼，每一字攏扑兩碼最簡碼，閣免選字，即種效率毋是別款輸入法有繃[penn/pinn]--个。
Comments powered by Disqus.