衛星定位个「相片地圖」足利便！

利用Nikon單眼相機个GPS配件，沿路哪翕像，哪將衛星定位資料寫入去數位相片內底，轉來上傳去 Picasa 網路相簿，著會用得看著配合相片顯示个完整Google地圖。（雖然定位無法度百分百精密，而且佇室內、磅空內收袂著衛星信號，袂用--得，但是已經非常利便。）

舉例：2010-05-01 漫步舊山線－－泰安舊車頭，這是我參加台灣文化書店所舉辦个「祕境團 Pì-kíng-thuân」活動，去台中后里泰安舊車頭一帶，看日本時代留落來个后里圳、磚仔橋、磅空，閣有田庄个光景。即所在个人口，多數是客儂，怹足清氣相，規个庄頭整理甲足肆是，予阮呵咾甲-。阮對地圖西北角个泰安新站出發，反時鐘踅一大輾。

因為這是我個人个記錄，所以相片有卡濟，若是欲做旅行指南予儂用，只要傳重要景點个相片就可以。

地圖會用得縮放，地圖頂面个細張相片有時會閘著地名、路名，只要將「地圖」放大，著看會著路名。

相機無法度直接記錄GPS个朋友，會凍另外買「軌跡定位器」沿路予伊記錄，一方面相機个時鐘愛對予準，按呢轉來才用軟體將定位器个資料寫入去相片內，才閣上傳，效果應該亦是差不多。