出名个台灣農村記錄片「無米樂」[Bô-bí-lo̍k]，導演莊益增[Tsng Ik-tsing]佮顏蘭權[Gân Lân-kuân]即對愛人仔工作伴，用三十個月个時間，攝影[liap-iánn]、製作出即齣片，佇公視記者會一下放影，隨時予社會呵咾甲會觸舌[tak-tsi̍h]，紲落來閣佇記錄片雙年展得著首獎。
怹無就按呢著滿足，繼續接受閣卡大个挑戰，來替一對為著台灣獨立奉獻[hōng-hiàn]一世儂个老翁婆，田朝明[Tshân Tiâu-bîng]醫生佮田孟淑[Tshân Bīng-siok]女士留落記錄。怹一開始是接受公視个委託，提著三、四百萬个簽約金，兩个導演佮一个助理，用五年个時間，設法克服種種个困難，包括：田醫生本儂倒在床[tó tsāi tshn̂g]，已經袂講話；用少少个經費，欲交帶七十年个歷史；為著欲提著歷史資料个授權，差一跪咧共儂姑情[koo-tsiânn]。
毋但按呢，影片做出來，出錢个公視煞有意見，當局欲利用即phō片來促進藍綠和解，希望以愛情故事為主，帶出台灣發展个大環境。所以要求將鄭南榕自焚事件刣掉，閣將林家血案刪除三份兩[sann-hūn-nn̄g]，而且修改旁白。
莊導演講，「促進藍綠和解？馬英九嘛做袂到、蔡英文嘛做袂到，煞創遮大頂个帽仔予即齣記錄片來戴，叫我欲按怎對田--家佮台灣个歷史做交帶？」
因為兩位導演个理念佮骨氣，佮公視 thi̍t袂直，最後解約、退錢，怹家治才閣另外去傱錢[tsông tsînn]。片扑好，連紲得著幾若項電影獎，煞因為無錢上映[siōng-ìng]，社會大眾愛等到今年十一月十八才佇幾間仔大戲園看會著。
我傍[pn̄g]著上親切古錐个台灣文化志工鄭惠敏小姐个福氣，提早佇今仔日下晡，去中興大學觀看即phō影片。佇片中，上予我感動个，是一對老翁某自少年到老一世儂，對兩儂之間个恩愛佮對台灣土地人民个大愛，永遠無變卦，甚至愈老愈強烈，親像一葩 iām-phà-phà个熱火[jia̍t-hué]，愈燒愈旺。
田醫師去日本留學，提著醫學士，轉來毋是帶藥仔，煞載規厝間个冊，無要緊欲加看寡病儂來大趁錢，佇「常關庵診所」內底，定定咧研究人文佮社會問題。
國民黨規定叫逐家去辦身份證，田醫師佇家治个面畫虎貓，去翕大頭像做證件，翕了嘛無拭掉，tsua̋n大範大範[tuā-pān-tuā-pān]行路轉去，按呢个抗議方式，無知个民眾看著，共伊指指揬揬[kí-kí-tu̍h-tu̍h]偷笑；曉理[hiáu-lí]个儂，著會想著田醫師無惜家治个面皮，想欲喝醒--咱，外來政權當咧加強對台灣儂个奴役[nôo-i̍k]，thún-ta̍h咱做儂个尊嚴。
減田醫師十六歲，閣咧讀台南女中个田孟淑，得著田醫師思想个啟蒙[khé-bông]，兩儂閣發展出靈肉合一个愛情。田小姐無顧序大儂个反對，佮田醫師相𤆬走[sio-tshuā-tsáu]。自按呢，兩儂牽手一路行到性命个盡頭，參與[tsham-ū]、見證著台灣戰後个民主發展史。
早年田--先生翁某，𤆬怹个幼囝，去花蓮病院食頭路。一擺田醫師哪看報紙个標題，哪出聲唸出廖文毅[Liāu Bûn-gē]佇日本從事台獨運動，隨時予儂去jiàu，人二室共田醫師點油做記號，閣要求伊愛揣儂來擔保伊思想無問題。田醫師不滿、辭職，換過公立病院，一間閣一間个頭路，甚至一家四口攏借睏佇病床。姑不將，尾手才賣祖產，開一間小診所來維持家庭。國民黨猶原不時來找[tsāu]麻煩。
田醫師為著欲佮政治犯个家屬密談，捌臨時歇業，將患者請走，因為伊知影患者閣有別个醫生通揣，但是根本揣無儂敢來救遮个良心犯。
田醫師常在[tshiâng-tsāi]出現佇民主運動个演講場，見笑家治無夠扑拚，一寡先進已經攏予儂掠去關，伊嘛隨時準備欲hông掠，吩咐田媽媽毋免替伊攢[tshuân]坐監个物件。
田醫師中風了後，七十幾歲个田媽媽，逐工妝媠媠，去到九十歲个田--sènn-ènn个病床邊，Honey, Honey……一聲閣一聲共伊叫，挲[so]伊个頭面、唚[tsim]伊个喙䫌[tshuì-phué]、捋[lua̍h]伊个身軀，扳[pian]伊个關節，講笑詼[tshiò-khue]予伊聽，呵咾--伊，鼓舞--伊，助tsān伊活落去个元氣。
聽著田媽媽講，「黃昭堂主席來看汝」，田--先生kheh-kheh个目睭一時間展甲大母蕊，放射出金光，規个喙tènn力，想欲開口佮黃主席閣講寡話，無奈病體無容允，一字都[to]講袂出來矣。
怹翁某所建立个典範，正正是貪財、驚死、愛面子、歹教好騙，長期冷淡自私个台灣儂个大帖藥！親像導演所講个，伊扑即phō，毋是欲講政治，是欲講一段台灣儂个歷史；伊毋是欲說服儂接受台獨个主張，是欲予儂知影台灣前輩為公義奮鬥个美德。
Comments powered by Disqus.