講俗語拆政府(002)「暗昏無叔孫，天光編字勻」

鋪出日 2014/01/07

作者 潘科元

5 分鐘閱讀

暗昏無叔孫，天光編字勻 [Àm-hun bô tsik-sun, thinn kng pian jī-ûn]。即句俗語是咧剾洗煙花女[ian-hua-lú]，有錢就是大爺，暗時接客，無管對方个來歷，頂一个儂客是下一个儂客个阿叔、抑是孫仔，攏無差。

「叔孫」是指「叔侄 tsik-ti̍t」，台語講「孫仔」有時指「囝个囝」，有時指姪仔抑是外甥仔[guē-sing-á]。

伊一暝所接个儂客是遐爾濟，到天光个時，甚至會使得「編字勻」，排列出儂客彼此个親情[tsiânn]關係，袂輸咧替怹寫族譜咧。

字勻是以前大家族表名[piáu-miâ]个規矩，愛照祖先所傳落來个「字勻」來號（時常採用詩句，抑是家訓），仝一沿个囝孫，名內底愛有一字是所定著好个字勻。按呢只要一聽著某儂个名，就知伊个輩份[puè-hūn]。

咱看馬英九佇半暝仔，無照憲法體制，濫糝來，僭權[tshiàm-kuân] 佮檢察總長黃世銘討論違法監聽得來个內容。咱借用即句俗語，就是「暗昏無叔孫」。

了後，馬英九用「違法關說」做藉詞[tsià-sû]，講為著「大是大非」，指揮國民黨機器，撤銷王金平个黨職，連帶欲甪捒[lut-sak]伊立法院長个職務，來維護政治秩序[tia̍t-sū]。這就親像「天光編字勻」。

妓女往往是不得已，若遮个政客，爭權奪利，無所不至，正是跤梢下賤[kha-sau hā-tsiān]。