警察廣播電台个台呼，唱「都馬調」

最近警察廣播電台台呼用歌仔調「都馬調 too-má-tiāu」來表現，即種文化創意通予咱呵咾。

但是伊有一字唱毋著，正音「路況 lōo-hóng」伊唸做 lōo-khóng。 像「狀況 tsōng-hóng」，蓋濟儂唸錯，講做 tsōng-khóng。這是予華語音「況 ㄎㄨㄤˋ」影響著，才走音去。 台語「況」个聲母是 h (ㄏ)，毋是 kh (ㄎ)。

「路況」正港台語詞講「路草 lōo-tsháu」，我無反對吸收，抑是創造一寡新詞來用。有舊詞嘛有新詞，會凍豐富台語，予台語詞个意義精密化。親像「路草」咱會凍用來表示卡靜態个路面佮路線分佈，「路況」會凍用來表示卡動態个交通變化。

但是欲用新詞，發音愛正確，毋通走音。