一、台灣傳統文化个傳承，一四界攏真危險，恆春民謠算是上好運，資源卡濟，上濟囡仔參加个矣。但是情形真悲觀，因為恆春囡仔佮別所在仝款，大趨勢就是台語程度愈來愈䆀（雖然怹个台語程度猶是比外地卡好）。
連生活台語都講袂好勢个下一代，無可能傳承台灣民謠。
二、早年原汁原味个恆春民謠，多數儂攏清唱，袂曉樂器，但是隨儂自由發揮，逐儂有個人風格。若會曉樂器个，是少數像陳達阿伯迄種天才，家治掠音試出來；無，就是家境好，有通聘請先生來教个儂。
三、當今恆春時行个月琴民謠彈唱教學法，其中一種予儂供體[king-thé]講是「協會風格」。我臆，這毋知咁會是當年吳燦崑老師「記譜、定譜」來佇恆春民謠協會開班所影響个？可惜，天不假年，吳老師英年就過往，若無，閣予伊時間研究落去，教學法應該會突破才著。
總是，我全然無怪伊，顛倒我足感恩伊，若無伊留落來个譜，我佇恆春短期間，無可能用古早無譜个方式去學著恆春調个基本彈奏。
四、早年雖然捌有一段期間，恆春民謠真興旺，鄉親凊彩儂攏會曉唱，但是在我土想，恆春民謠本身，猶未發展到充份成熟个階段。
恆春民謠是多民族（漢、高山、平埔）个音樂佮語言融合个結果。伊已經攏改用台灣閩南語咧唱，但是猶未成熟甲會凍完全「照台語字音來行腔」个坎站，袂凍像北部个唸歌予儂歌詞聽真明。
而且像陳達彈唱思雙枝，只彈起點、過點，佇唱个時，就無彈，但是北部唸歌，已經成熟甲佇唱詞个時，演唱者毋但會曉「依字行腔」，閣即時掠出歌詞个主要聲調峘低，彈琴來配合。
五、到甲「協會風格」出現，雖然自頭至尾攏有彈琴伴奏，但是煞變做唱法予彈个旋律束縛椆咧，相對來講，卡少古早迄種感動儂个自然性命力。
六、社會變遷太緊，無論是北部唸歌，抑是恆春民謠，攏喪失會凍予伊繼續生湠个肥田矣！一旦老先覺歸仙去，只賰幾个仔中年个有心儂，佇即个斷根个台灣社會罔變弄爾爾。
(2012-09-18 facebook)
Comments powered by Disqus.