古意狗仔阿勉佮古錐貓仔阿桔[kiat]是一粒一[it-lia̍p-it]个好朋友，怹真愛答喙鼓來做耍滾笑[tsò-sńg kún-tshiò]：
阿勉：「阿桔，我出予汝對[tuì]。 」
阿桔：「做汝講--來。」
阿勉：「海。」
阿桔：「『海』對『山[suann]』。」
阿勉：「雞。 」
阿桔：「『雞』對『giâ』。」
阿勉：「啥乜是 giâ？」
阿桔：「漳--个講鵝[gô]，泉--个講鵝[giâ]。」
阿勉：「汝平聲[piânn-siann]个『雞 ke/kue』毋對仄聲[tseh-siann]个『鴨 ah』，刁工欲對仝款平聲个『鵝』。汝現現是狡怪貓，毋是古錐貓！」
阿桔：「這是白話，意思有通較要緊，平仄無對毋免傷掛意啦。汝無聽儂講『天[thinn]對地，老母對老爸[pē]，鱟桸[hāu-hia]對飯篱[pn̄g-lē]，鼎𥴊[tiánn-kám]對鼎摖[tiánn-tshè]，頭殼碗對五筋枷[gōo-kin-kê]』。『母、爸』攏仄聲，『𥴊、摖』嘛攏仄聲，儂嘛是咧對。」
阿勉：「汝真𠢕服侍諍王[ho̍k-sāi tsìnn-ông]！按呢『雞母』欲對啥？」
阿桔：「『雞母』我欲對『鴨雄』[ah-hîng]。 」
阿勉：「對轉來『鴨』矣hōnn！閣來，『海雞母』。」
阿桔：「『海雞母』對『suann-giâ-kang』。」
阿勉：「喂！山蜈蚣[suann-giâ-kang] 个『giâ』毋是迄種『鵝』啦！」
阿桔：「海雞母嘛毋是迄種『雞』啊！」
註：
一、台語「鴨雄仔 ah-hîng-á」是指猶未大隻个「鴨kak、鴨公」。查埔囡仔青春期咧變聲，定定予大儂形容做是「鴨雄仔聲」。
二、台語「海雞母」至少有三種意思，第一是指「海鷗」，第二是指一種「笛鯛科」个魚，第三是指 kā拄入港个漁船割魚貨个生理儂，即三種意思攏無屬佇「雞」。
三、台語「山蜈蚣」是羊齒類植物。
四、用口語做對句，來訓練囡仔个語文能力，佇閩南、台灣有久長个歷史。我看前賢洪舜延先生所做个〈台諺聲律啟蒙〉，單字對抑是兩字對个部份，大部份攏有照平仄，總是也有例外。若是較長个俗語句讀[tāu]，伊就顧袂著平仄矣。
Comments powered by Disqus.