陳達唱「祖先堅心過台灣」毋是「祖先鹹心過台灣」

「Sù--ah siang-ā-a-ki，祖先堅心啊哩來過台灣」陳達先生所唱即句个「堅心」，真濟儂，包括歌詞記錄者，煞掠做是「鹹心」。

「堅心」是 kian-sim，寶貴个台語詞，台語老歌「秋風夜雨」就有唱著「堅心為君，保守阮青春」。
「鹹心」是 kiâm-sim，意思無通，阮毋捌聽過，台語辭典文獻也全然查無有即種講法。

1. 咱斟酌聽、放慢聽，就聽會出來伊唱「堅 kian」字，到收尾个時，絕對毋是「鹹」字韻尾个合唇音 -m。

2. 陳老先生喙齒無完整，講話唸歌小可仔落風，但是伊無缺喙[khih-tshuì]（兔脣），講合唇音伊無問題，伊若是欲講「鹹」，一定唸會出 -m 韻尾。

3. 「堅」字教羅、台羅攏寫做 kian，即个 -ian 韻母，是反映古早閩、台語个音，ian 實際个音值，一直咧變化，ian 先變 iɛn（韻腹 低母音 a 予前後个懸舌位音 i 佮 n 搝懸去），閣變 ɛn。

陳老先生保存有 -i- 介音个唸法 iɛn，「堅」字伊講 kiɛn，目前真濟台灣儂因為怹是講「堅 kɛn」，所以聽著陳老先生个 kiɛn就真容易掠做是 kiam，愈少年个愈分袂清，因為怹連 -m 韻尾嘛講袂好、分袂明矣。

伊即葩 Sù|-siang-ki 个歌詞後壁閣有一寡所在，我感覺愛閣探討。

Youtube 「月琴之友」即位上傳者記「堅心」，按呢就正確：https://youtu.be/FGxWdXBUm6k
但是閣來幾句个寫法可能有問題。

---

聲明：回應請毋通提起 Sù|-siang-ki 漢字按怎寫（思想起、思鄉起、思想枝、思雙枝、自想起、樹雙枝、士雙車……），我懷疑即三音節並毋是漢語，各種漢字个寫法恐驚攏是倚音牽意來鬥字爾爾，但是佇遮無法度討論即个問題。