青盲牛

我是一个文化个青盲牛。無論文學、哲學、藝術各方面，攏總無半撇。讀大學以後，所學--著个，差不多攏是卡倚技術性个智識。見擺若過--一--站--仔，去予我想--著，就會去揣一寡文史哲个冊來讀，毋閣一直自學[ha̍k]袂起來，到tann un-na閣是一箍 liù-liù，是一个無文化个儂。

佇目今即个網路時代，卜揣資料，逐家愈來愈倚靠網路。不而過，人類个文明、文化、思想，有記錄佇字紙頂面个，相信一百份閣無一份有上網；抑有上網个，而且是卡深入、完整个資料，閣有袂少是限制掠取个，著愛付費，或[ia̍h]是另外愛有特別身份tsiah看會著。傷過依賴網路个結果，就是定定攏kan-na看著浮[phû]面、零碎[lân-tshuì]个物件，著準汝雖是有可能得著某方面最新發展个一寡訊息[sìn-sit]。

儕儕教育單位、文化事業，相爭[tsinn]將資料上網。線上个資料庫愈來愈儕，成[tsiânn]做研究者無用袂使--得个媒介。像阮學校个圖書館網站，晉前就已經有袂少個別个線上資料庫，予儂點連結過去查詢。最近閣進一步，將 netlibrary.com 个線上書冊整合入來圖書館个館藏查詢內底。查著一本啥麼冊，無的確是愛走去圖書館看，有个是提供連結，直接連過去踮線上讀。

連無愛讀冊个儂，嘛發覺講愈來愈儕生活資訊，只有網路tsiah得會著。網路已經變成[piàn-tsiânn]二十一世紀个「電力」矣。

毋閣，像我即種對無網路時代活過來，而且有心想卜加讀寡冊个儂來講（「冊」个定義是深入个智識个記錄物），到tann iáu是袂慣勢線上閱讀[ua̍t-tho̍k]。面對有連線个電腦个螢幕，我个心就 sò-piak-piak，佮我掀開一本冊起來看个時陣完全無仝。心袂靜，thah會讀有冊？

下一代个囡仔，自細漢就活佇網路世界，姻个「心」又閣是啥款，姻按怎積聚[tsik-tsū]恬淀[tiām-tīnn]个智識？