點字機

今仔日卜暗仔，佇學校特教系館頭前，看到我熟視个手語社个學生，坐佇gîm-kînn塊學點字，真歡喜，就共姻請教，後來閣佮姻做伙上課，學練操作點字機，感謝蔡老師佮所有个同學tsiah-ni̍h親切熱心共我牽教。

現時佇台灣通行个點字系統，所用个基礎是法國儂 Braille 設計个一直排三點、兩排共[kāng]六點做一組个系統，表示漢字是用對應注音符號个拼音法。有聲母、韻母佮「結合韻」。「結合韻」是一種簡省法，將介音佮後壁合做伙，毋是像注音符號按呢，閣分開做兩个獨立个符號。聲調四聲加輕聲，計共五種。所以任何一字上加[ke]用著三組符號（聲母、韻母、聲調），上少用著兩組符號（空聲母个時）。

ㄓ ㄔ ㄕ ㄖ ㄗ ㄘ ㄙ所用著个「舌尖元音」，注音符號一般無寫出來，但是即套點字系統嘛愛扑出來，伊是用ㄦ个點字來表示。

對北仔話音韻結構有初步了解个儂，就知影ㄐ ㄑ ㄒ即組舌面音是佮舌根音ㄍ ㄎ ㄏ互補，嘛佮ㄗ ㄘ ㄙ互補。所以佇符號設計上，ㄐ ㄑ ㄒ thang佮ㄍ ㄎ ㄏ公家符號，抑是佮ㄗ ㄘ ㄙ公家。毋閣即套點字符號真心適，ㄐ佮舌根音ㄍ共用符號，抑ㄑ ㄒ卻是佮舌尖音ㄘ ㄙ共用。

另外，伊佮英文字母雖然個別个符號有重疊，毋閣拼寫起來就分會出，所以毋免另外用「引tshuā符號」來提醒儂講後壁開始是英文。英文字母个部份是用外國儂早前就設計好个，「點个分佈」佮英文字母个順序有規律性个對應。抑中文注音符號个點字卡慢有，可能為著卜佮英文「相容」，所以「點个分佈」bô-thang配合注音符號，予伊有規律性，著愛硬背。有儂想出一寡撇步來幫tsān記持[tî]，總是，並無一貫个法度來記。

Braille 的六點系統，個別符號个可能性有 64 種，毋知伊咁有對易經[ia̍h-king]八卦得著靈感？

Tsiah久仔，有一部[phō]日本翁仔冊佇台灣上市，小手川瑜亞个《死刑囚042》，雖是極悲慘个主題，毋閣作者共處理了不止軟性。身phāinn七條人命[jîn-bīng]个男主角接受一項有關廢除死刑个實驗，同意政府踮伊頭殼碗內裝一个炸彈，只要伊个性地夯起來，到甲足額thang thâi死儂个坎站，tsik時會引爆迄粒炸彈。用按呢做交換條件，予伊出監[kann]，去一間高中顧花園。

佇遐，伊熟視著一个失明个查某學生，佮一个來做義工共迄个學生扑點字个ok-sàng。佇政府實驗人員二四小時共監視个處境中間，伊hām姻生出各種个感情，ta̍uh-ta̍uh仔走揣伊失落个天性佮良知。

即部翁仔冊我頂日仔拄看著，內底有出現點字个家私[ke-si]，親像點字板。今仔日有機會通真正摸著，這就是人生个因緣啦（茶^^）