2023-08-08學習日記

生活記事

日--時開會。暗時先去附近一間新開个素食飯丸兼霜淇淋佮咖啡店食飯丸佮霜淇淋。 飯丸內有一項物無啥kah喙，毋知是毋是我另外要求伊摻入去个天貝个味？ 霜淇淋傷甜，媠姑娘店員講彼是莓果--个，所以較甜，若是抺茶--个就袂。

食暗飽坐捷運去踅101大樓，經過一間過一間个世界名牌店，店窗櫥个衫褲、時表仔， 看著全然袂唌儂愛。怹心目中个儂客根本毋是我即種儂，所以我袂佮意都佮怹無干礙， 只是無派胚我呔會感覺怹个物件足倯？

學習台語

「符合」扑算全台灣九成九以上个儂台語攏講 hù-ha̍p。 教典干焦承認 hû-ha̍p 也是佮社會脫節爾爾。「避免」教典除了音讀欄標 pī-bián， 至少閣有收俗音 phiah-bián。若是「符合」就只收一音 hû-ha̍p。

語音傳播个速度 siat-thái緊。像【網路 bāng-lōo】無幾年爾， 全台灣扑算九成五以上若講台語攏唸做「báng-lōo」矣。