2023-09-02學習日記：江湖話

學習台語

佇面冊看著一个叫做「每浩溝」个少年家製作个一寡有江湖khuì个趣味短片。 伊愛釣魚，有兄弟儂个氣口佮面tshiunn、目神。

我先看著伊一塊短片， 是演伊咧拜拜，投下[tâu-hē] Hê-á神，講甲真煞扑[suah-phah]、真有範。 雖然伊講「我」个聲母 g- lak無--去矣：

Hê-á神在上，弟子 Bē-hàu-koo 連紲兩遍去五條港釣魚，聖駕攏無獻靈出動， 今仔日攢著三牲四果，飲料果汁，誠心誠意來共 Hê-á神 祭拜，tsiàng時 弟子閣欲前往五條港釣魚，恭請聖駕隨我[ngóo]前往，賜我[uá]趁大錢、釣大魚。 三斤--个有--無？（有喔！）四斤--个有--無？（有喔！）禮成！化金！

我毋知影啥乜是 Hê-á神，伊字幕寫做「撈神」。頂面我寫「獻靈」，是因為伊唸 hiàn-lîng，毋過伊字幕是寫「顯靈」。台語「獻」我 8/29 拄討論過，有「顯現」 个意思。

伊閣一塊短片，講著「制式」个武器，叫做【制–个 tsè--ê】。 閣一片，講著「出來濫[lām]」，是指兄弟儂〔出來混〕。

阮序大儂講「無愛佮儂濫」，是指無愛出去參加團體活動、社交活動。

補充

面友施先生來分享𪜶阿公對伊講過个話：

恁阿舅少年時出去佮儂咧濫，去廟口佮儂濫，好好穡頭毋做，（台中）港个頭路煞拍無去

「較早彼米國仔駛pue-lîng-ki 來，hooh 彼銃按呢咧彈，彼飛行機銃攏tsè–ê, 足大支，彈着，彼牛角都共彈斷」
我進前聽無tsè, 問阿公講是工廠出來、統一个、仝款个

我本底掠叫是「佮儂濫」、「tsè–ê」攏是江湖儂个新話，原來老輩个鄉親就有咧講！

學習日語

讀寡 JapanesePod101.

學習電腦

讀寡 Learning Perl 6.