2023-09-16學習日記：華語〔老虎、烏龜、大象〕台語講一字「虎、龜、象」

學習台語

台語講「虎、龜、象」，華語講〔老虎、烏龜、大象〕

華語〔老虎〕，台語慣勢講一字 hóo；華語〔烏龜〕台語慣勢講一字 ku； 華語〔大象〕，台語慣勢講一字 tshiūnn / tshiōnn。

所以台日典並無收「老虎」、「大象」 。抑台日典是有收【烏龜 oo-ku】 解說是「烏色个龜」，但是例句是古早時代轎班（扛轎个行業）个癖話： 烏龜鎮路[oo-ku tìn-lōo]。

扛轎至少愛一前一後兩个儂來扛，扛頭前个儂也愛負責觀察路草， 若發現頭前路中有牛屎，就愛喝聲「烏龜鎮路！」，予扛後壁个儂知影愛準備閃過。 這是勞動階級真有語言智慧个表現，咱通設想講伊若是戇直戇直， 不時喝講「頭前有牛屎喔！」坐佇轎內个儂客聽著，的確袂偌爽快。

【烏龜 oo-ku】教典是有收，但是伊解說「龜」即種動物寫一大段， 最後 puh 一句『口語中一般只說「龜」』。咱斟酌 kā 看， 煞尾即句話並無句點。原來即句話以前教典無，是後來補个， 但是咧補个時煞袂記得加句點。

教典進前收「烏龜」當做是「龜」个台語生活用語， 後來副總編輯佮其他个委員發現毋著，提出異議， 但是即个「烏龜」已經收遐久矣，欲刪除也是麻煩， 毋才用補充一句話个方式來解決……。

阮細漢个時，有共薰kheh仔拆開，共彼包裝紙拗拗咧來耍。 耍个方式，我干焦會記得是共伊 siak 落去塗跤，若是成做某一種形體， 阮就會喝講【烏龜！】可能這也是對牛屎个癖話演變來个。 無論語源按怎，真正个龜阮就干焦講一字「龜」，袂講「烏龜」。

「烏龜」舊社會个台語真正常用个都合是唸文音 oo-kui，意思是華語所講个〔龜公〕， 指妓女戶个查埔管理者，若強調伊是頭家，就講 oo-kui-thâu（查某管理者／頭家叫做 lāu-tshang（老娼）、bâ-thâu（媌頭）等等，對應華語〔老鴇〕）。 若是不仁不義、賣某賣查某囝个漚貨，也是會予儂講伊是 oo-kui。 閣有華語俚語講「戴綠帽子」个儂，也會予儂偷笑講伊是咧「做oo-kui」。

用 oo-kui 來造个複合名詞袂少，攏是罵儂个話，遮無列，各位聽好家己去查台日典。

補充：台語閣有講【龜仔 ku-á】，這毋是指「細隻龜」，是指〔金龜子、瓢蟲、甲蟲〕 即類个昆蟲[khun-thiông]。若是講【龜仔囝 ku-á-kiánn】也毋是咧講「龜仔」个「囝」， 是罵語，像華語〔龜兒子〕按呢。

學習日語

讀 JapanesePod101.

學習電腦

讀一屑仔 Learning Perl 6.