2023-10-03日記

生活記事

E-tsái-á 載 Má-á 去潮州鄭漢醫遐。Má-á 講咧睏个時，喙真焦。鄭漢醫有調整藥方。

我也頭一遍予伊看鼻仔過敏𠢕流鼻水个症頭。Má-á 一直勸我著予醫生看。

Musk 新傳記

Elon Musk 个新傳記九--月出版矣，簡體中文譯者有做 25 分鐘个 Youtube 影片來紹介， 我有看矣。

Musk 自細漢就是天才兒童，伊憨慢佮儂盤撋，佇學校定定予同學侮凌。 捌有一擺 hông 扑甲著重傷入院一禮拜。出院轉來厝裡，煞予老爸教示規晡 （感覺台灣頂沿个爸母有真濟也是 tsit-lō 形），實在有慘。若欲是我， 可能早就厭世自盡矣。

Musk 創辦經營遐濟間公司，一致个大目標就是欲予人類會凍佇其他个星球繼續生存發展， 通保存延續人類个文明。若無，幾億年後，地球可能就會予脹大个太陽燒去。

文明真脆弱，人類个智識僫保存。毋但幾若千年个金字塔、羅馬建築个技術失傳矣， 連二十世紀登陸月球个智識也因為美國後來停止計畫，流失真濟去矣。

漢朝古詩：「生年不滿百，常懷千歲憂」。像 Musk 即款儂，彼毋是千歲憂，是億歲憂。