Facebook 台語社徵求共同管理志工 公告

【公告：台語社 徵求共同管理志工】

各位先進，因為小弟欲轉鄉里一段期間，阮兜網路無便，袂得通時常來看頭看尾巡田水。所致著愛加徵求一、兩位共同管理志工。敬請賢者來tsōo-tsān，感恩。

甲、條件如下：

一、熟識[sio̍k-sik]台語羅馬字，來台語社慣勢寫台語文。
二、支持小弟所擬的台語社發文規定，也肯繼續照按呢執行。
三、時常（一兩日內）會來台語社版面關心。
四、佇 Facebook 佮台語文界的眾友志，有相當的互動。

乙、工課如下：

一、出現糞埽廣告，刪文、封鎖發文者。

二、審查入社申請。著細膩，毋通來者不拒。因為有足濟人入社干焦欲來貼糞埽廣告。審查的法度，大概是按呢：

申請者若無用正式名姓，尪仔標毋是本人，也無交陪台文界的朋友；抑是尪仔標是夢幻的美女像，特別是獻胸 làu-ling 彼種，著愛足斟酌－－點入去伊的頁面，看伊有參加較正經的社團無？伊貼的內容有小可仔咧關心台灣、台語無？若攏無，上好莫予伊入來。

三、佮討論台語文無 tī-tāi 的人身攻擊文字，刪除。

四、管理志工無義務解答台語文問題，單純做志工維護版面清氣，所以請毋免顧慮家己程度無夠。

丙、報賞如下：

為挽救台灣母語，出淡薄仔氣力，對按呢得著成就感，也佇不知不覺當中，提昇家己的台語文實力。

以上。有意願的先進，請留言回應，勞力。其他的意見，也歡迎討論，多謝。