IE8

微軟[Bî-nńg]公司最近推出[tshui-tshut]新版个 IE8，咱用Windows Update更新系統个時，伊會自動下載即部份，叫咱著更新 IE。因為我知影 IE7 對 CSS 个支援嘛是閣無夠，看著 IE8 出來，著予伊更新。

做了，發現系統真袂穩，閣一直跳出一个視窗講：Windows為著系統安全，Internet Explorer (IE) 已經停止工作。真正有夠倒彈。聽講這愛去點「工具->網際網路選項->進階->重設」。我無用，先共IE8刣掉才閣講。

微軟利用伊市場霸主个地位，共儂个瀏覽器摃予死了後，家治出个瀏覽器tsuan9放予爛，囥幾若年攏無改善。真儕做網站个儂，眼界淺近，干那佇漚古[àu-kóo]、無符合標準規格个IE頂峘做開發，閣為虎作倀[tshîng]，強迫使用者一定愛蹛Windows頂峘用IE來上怹个網站。低路[kē-lōo]个網站配搭跤梢[kha-sau]个瀏覽器，號做「最佳个企業解決方案」。

即幾年對IE7到IE8个發展。微軟袂輸有卡知影通[thang]尊存[tsun-tshûn]「網頁標準」矣。結果倚靠舊版IE所開發，無合網頁標準个網站（以下簡稱「漚站」[àu-tsām]），佇新版个IE8煞tsuan9袂用得矣。IE8毋才創出一个「相容性檢視」个選項來處理即種問題。一般个使用者若袂曉去扑開這个選項，或者是講臨時用別台電腦，無想著愛去開即个選項，上[tsiūnn]漚站个時，著有可能因為網頁無正常，遭受損失。

大武四界个微軟个死忠開發者，恁按算卜閣予微軟變猴弄到tī時才會覺悟？

我毋是建議儂勿使用微軟个產品，我是卜講開發網站，一定愛順趁W3C个網頁標準，毋通痟貪去服用微軟用「獨/毒家配方」所做出來个大補丸。利用微軟个快速開發工具，製作出私密規格个漚站，干那微軟个瀏覽器才會得通正常觀視使用，這是對「無障礙[bû-tsiòng-gāi]網路環境」个破壞，危害[guî-hāi]著健全个網路生態。佮迄號無顧商業道德个壓霸公司狼狽為奸，毋但阻礙文明个發展，緊縒慢[kín-tsua̍h-bān]嘛會傷害著家治。