我做出一套「TLPA 轉新版台灣羅馬字 MS Word 2003 巨集」，歡迎逐家試用。源碼開放，請內行儂提供程式修改个寶貴意見。以下是安裝使用說明檔：（說明檔是 Big5 中文編碼，所以「个」攏寫做「兮」）
TLPA 轉新版台灣羅馬字 MS Word 2003 巨集（TLPA2TL 0.5版）安裝使用說明
0. TLPA 系統是用數字來表示聲調，抑新版兮台灣羅馬字(TL)是照教羅兮款式，使用母音頂峘兮調號來表示。TLPA 聲母 c 佮 ch，台羅改做 ts 佮 tsh。抑新版台羅放棄傳統教羅兮「葫蘆點」佮「鼻音上標 n」。
1. 系統愛另外安裝劉杰岳先生製作兮 Taigi Unicode 字型。本軟體將 TLPA 轉做台羅兮時，會將字型嘛轉做 Taigi Unicode 字型。請自行前往 http://www.phahng.idv.tw/taigi_unicode_font.htm 下載迄種字型，按照伊兮授權說明來合法使用。
2. 下載 http://info.sayya.org/~khoguan/dl/TLPA2TL.zip 將伊解壓縮，出現兩兮檔案，一兮就是本說明(TLPA2TL_readme.txt)，一兮是巨集範本TLPA2TL.dot，將即兮巨集範本檔複製去
C:Documents and Settings使用者登入名稱Application DataMicrosoftWordSTARTUP
目錄內底。卡方便兮做法是扑開「我的電腦」抑是「檔案總管」，佇頂峘兮「網址列」將頂面所講兮目錄名稱貼起去（將其中兮「使用者登入名稱」用汝登入 Windows 系統桌面所用兮真正名稱來代替），然後 tshih8 Enter，就會出現一兮通常是空空兮目錄。即陣就可以將解壓縮所得著兮 TLPA2TL.dot 拖入去即兮目錄。
執行 MS Word 就會看著頂峘加出一排「工具列」，其中「TLPA轉台羅」就是本軟體提供兮轉換功能，其他兮鈕仔是對「一般」佮「格式」工具列複製過來，方便汝佇執行轉換功能了後，閣手工調整格式。
若無看著加出一排有「TLPA轉台羅」兮工具列，請去功能表兮「工具->自訂」兮工具列迄頁，揣出 "TLPA2TL" 即兮名稱，共伊勾起來，點「閉」。轉來 Word 兮文件畫面，就看會著迄兮工具列矣。
3. 卜轉文件內底兮叨一部份，只要將迄部份反白(mark/select)，然後點頂面所講工具列頂峘迄兮「TLPA轉台羅」兮鈕仔，就會自動替咱轉矣。
4. 一般兮情形，反白兮部份創卡大咧，將中文字佮其他兮英文攏包括在內，嘛無要緊，本軟體干那會去動著 TLPA 兮部份。為著執行兮效率，程式內底塊比對 TLPA 兮音節，雖然有考慮著台語聲母、介音、韻腹、韻尾兮結構，毋閣會包含非台語兮組合入來，亦就是講有一寡「英文字母加上一兮數字符號」兮組合，雖然台語並無接受，但是本軟體煞嘛共算是 TLPA。使用者兮文件若有即種符號，親像數學式，迄部份請毋通反白轉換。另外，有寡例外，請看後壁兮說明。
5. 本軟體目前是針對小寫 TLPA 做處理，因為 TLPA 一向定位做「音標」毋是「文字」，所以一般攏無親像教羅按呢句頭字母大寫。只處理小寫，會使避免將「A3兮紙」兮 "A3" 嘛當做台語音標。
6. 一般兮 TLPA 文件攏無用連字符號(hyphen)，本轉換軟體，將 TLPA 轉做 TL 兮時，會判斷講原來兮 TLPA 若是多音節相紲無 lang3-phang7(space)，就會自動插入連字符。一來是按呢才看會分明，二來按呢有合教羅兮習慣，三來，這嘛是為著程式卡好寫起見。
7. 因為 Taigi Unicode 字型看起來比上tsiap8用兮英文字型 Times New Roman 卡細一號，所以轉換程式會根據原底 TLPA 音標佇文件裡所設定兮字體大小，將轉換以後兮加大一號。毋閣，系統無啥穩定，有時陣轉出來袂凍原全，共款閣是本底兮大小。另外，若轉出來兮調號離母音傷峘，就表示字型轉無成，請手工共改做 Taigi Unicode 字型，看著卡嫷。總是，字體大小、字型，閣有定位點(tab)兮闊度，有時會小可無正常，請家治閣修一下。
8. 有時反白(mark/select)一兮大範圍，其中有一、兩兮音節會轉袂成，請針對迄一、兩兮音節閣反白起來，閣轉--一擺就可以。請注意，TLPA 兮文件內底，有時會出現表示「調位、調值」兮數字，迄種數字毋是「調類」數字，無應該轉做台羅兮調號，所以本軟體干那接受音節後壁會凍出現孤一兮數字，若有連續兩兮抑是以上兮數字，毋管上標、下標，攏當做彼毋是調類數字，袂共轉。親像文件內底有「台」--字，音標是 tai512，第一兮數字 5 是上標字，表示調類，第二、三兮數字是下標字，表示調位，按呢汝著愛單獨反白 tai5 即部份，本軟體才轉會出台羅調號，若反白兮部份包含 tai512 歸兮，就轉袂出來。
汝兮文件若有表格佮一般文字，請分開 mark、分開轉換，毋通做一遍轉。另外，反白兮區域，佇轉換了後，有時會變卡小；亦就是，反白區結束兮所在會 kiu 對頭前去。這無啥影響。
9. 第九聲佮輕聲，TL 益未定案，本軟體且無處理，保留 TLPA 原樣。泉州腔兮特殊央元音 er 佮 ir，本軟體會曉轉。抑漳州腔特殊元音 ee，調號會撇對第二兮 e 頂峘，請家治調整一下。
10. Bug回報、改進意見東西，歡迎連絡作者潘科元，電批信箱是：khoguanp (at) yahoo (dot) com
11. 本軟體採用 GPL 2.0(GNU General Public License)授權，歡迎逐家利用。作者基於善意，公開此軟體，使用兮時，一切後果請使用者自己承擔。亦就是講，若因為本軟體兮失誤，生出任何意外，致使汝兮系統、資料遭受任何損失，不可要求本軟體作者負責。
12. 另外，若有修改本軟體，請主動通知作者，嘛寄一份改過兮軟體予伊參考，予作者有機會閣進步。感謝。
2006-09-23 潘科元
Comments powered by Disqus.