頂回我寫〈Unicode 6.0 新收个台語漢字〉，有用教育部推薦用字 第三人稱複數「𪜶」(亻+因 )，若是各位个電腦看著引號內底是四角空格仔，毋是正常个漢字「左亻右因」，就表示恁電腦字型个支援無夠完整，所致才顯示袂出。
因為我是用 Mac，本來掠準 Windows 7 就會凍顯示「左亻右因」，即馬才知，目前 Windows 作業系統，只有上新版个 Windows 8，免咱操煩，佇 IE 原裝瀏覽器就看會著「𪜶」(亻+因 )，其他較舊个版本 Windows 7 / Vista / XP，攏總愛費神安裝額外个字型、軟體。Tann我列出一寡法度予恁參考：
〇、咱眾儂暫時攏勿用「𪜶」(亻+因 )，用異用字「怹」就好，等幾年仔過，多數儂攏升級到新版作業系統，才來採用「𪜶」。
一、改用 Firefox 瀏覽器軟體來上網 http://moztw.org/firefox/ ，而且安裝使用有完整收錄最新 Unicode 漢字个「花園明朝體」字型。若看會著「𪜶」字，而且汝也滿意 Firefox，以後就繼續用。以下个步數就免管矣。
二、若是咱iáu是較佮意佇 IE 瀏覽器來看網頁，而且希望看著「𪜶」(亻+因 )，請參考以下連結文章內底个「安裝方式簡要說明」，有分 Windows XP 佮 Windows Vista / 7 个做法：
Windows 8 內建的新細明體已經支援 CJK Ext-C/D 字元集了！
伊內底有提起「Unicode 中日韓統一表意文字擴展 A/B/C/D 區（CJK Ext. A/B/C/D」，Win 7 干焦支援到「擴展 A 區、B 區」，但是咱即个「𪜶」(亻+因 ) 是收佇「擴展 C 區」，所以無加工過个 Win XP / Win 7 攏總看袂著。
貴君對家己个電腦能力若有淡薄仔自信，才通「服用」伊个「藥方」，我是好心報恁參考，我無佇恁身邊，恁電腦若安裝了出問題，請原諒我無法度負責。
Comments powered by Disqus.