facebook社團「台語文電子冊技術研究社」創社宣言

電子冊个時代已經來矣！弱勢个台語文，比強勢語文閣卡需要利用電子冊个優點來推捒。目前已經累積袂少台語文个網頁資料，咱該當就即个基礎，進一步來推廣台語文電子冊。所以建置即个社團，招邀[tsio-io]友志來研究、合作。

咱比較卡靜態个網頁，電子冊有真濟優勢：

• 下載落來，隨時thìng好佇各種隨身設備（手機仔、平板電腦）來閱讀。
• 透過雲頂服務來進行同步，一份資料，同齊出現佇個人濟濟項設備內底。可比講，即本電子冊，我佇厝內个 PC 讀到某一頁，了後出外坐公車，手機仔提出來，即時通接落去讀。
• 佇電子冊頂面做書籤、註記等等，會用得傳轉去電子冊平台，分享予現在佮未來讀即本冊个任何儂，嘛方便進行網路讀冊會。這對推捒台語文，意義重大！
• 冊有新版出來，即時知影thang更新。
• 讀電子冊，坐卡會椆、讀卡會落；看電腦網頁，一下仔就袂堪得矣。

即个社團个重點，主要是佇技術方面，欲來研究按怎製作台語文个 epub 電子冊（尤其是多媒體个）、建置台文電子冊平台（採用 Open Publication Distribution System, OPDS, 協定），閣將成果提供予社會利用。

(2012-09-26 facebook)