「中華文化基本教材」應該改做「東方文化基本教材」

孔子个智慧猶原值得咱个參考。只是「獨尊儒術」[to̍k-tsun Jû-su̍t]个觀念、做法已經過時。若欲叫學生一定愛讀「中華文化基本教材(=四書）」當做「國文課」个一部份，不如開設「東方文化基本教材」，來選讀「儒、釋、道」个經典漢文文本，而且進行思辯性个多元價值觀啟發，毋是教條个灌輸。

毋過有一个問題，著是目前个師資，恐驚無迄號才調來教。勿講「儒、釋、道」三家[sam-ka]教無路來，各位會遐討厭「中國文化基本教材」，在我看，一个重要因素是，咱个老師攏是照本宣科，而且所「宣」个，是統治者个利益，毋是經典个本來面貌（我高中上即个課，嘛攏咧睏，後來研究所才家治佇外口揣老師，用台語讀）。

東方个孔子、老子、釋迦，無卡輸西洋个希臘三哲抑是耶穌。西洋个哲學家嘛毋敢看輕東方个思想。日本儂到今，亦猶原應用真濟，按呢來融合西洋思想，怹才有法度佇某一寡方面超越西洋。若只是完全學西洋，絕對永遠逐項攏綴西洋儂無bué-tsuē。