人類古文明建立佇階級意識

最近想著一个觀點，舊約聖經有三重个階級觀：上帝、儂、萬物。

低級个愛順服懸級个，懸級个愛疼惜低級个。
但是低級个若狡怪，懸級个就會打揲[tánn-tia̍p]--伊。
（打揲就是『修理』）

這是註定个三階級，絕對袂使扑破，也絕對無平等个可能。

雖然聖經个思想「進化」到一神論，但是猶原嚴嚴遵守階級意識。

這也是世界各地古文明普遍存在个意識型態，尤其是東方文明，做了特別「成功」。

但是東方文明也有出現兩个異端來制衡：佛家佮道家。

用階級意識維持社會運作个民族，日本儂做了特別有質感佮美感，有才調變做文創商品銷予全世界个青少年。佇即个全世界攏崇拜西洋個人主義个時代，怹个業績實在驚儂。