「〇仔[á]」是台語真四常个構詞。「仔」頭前个「〇」--字，聲調有進一步个變化。就台灣通行腔來講，「〇」袂使變做高降調抑是低調。比較「鋸柴」个「鋸」是變高降調無錯，但是「鋸仔」个「鋸」是變高平調；閣像「社頭」个「社」是變低調，但是「社仔」个「社」愛變中平調。
但是這有腔口差別，比較：
一、一部份个海口泉腔：狗仔[káu-á]（狗 變高調）、勾仔[kau-á]（勾 變中調）、猴仔[kâu-á]（猴 變低調！），三種攏無仝音。
二、優勢腔：狗仔[káu-á]（狗 變高調）、勾仔[kau-á]（勾 變中調）、猴仔[kâu-á]（猴 變中調），所以「勾仔、猴仔」即兩个詞變仝音。
三、高雄大社腔：狗仔[káu-á]（狗 變中調）、勾仔[kau-á]（勾 變中調）、猴仔[kâu-á]（猴 變中調），三个詞全部變中調，講出來攏仝款！這就是豬哥亮个腔，伊講「桌仔」，咱會聽做「刀仔」。 其他閣有足濟腔口變化。
請注意：「仔前變調」佮「輕聲个 "--á」無仝款。像「阿吉仔 A-kiat-á」，若毋是表現親密，就是一種輕視个叫法，這是「仔前變調」；但是講「阿吉--仔 A-kiat--á」只是普通个儂名詞尾。閣一種「阿吉啊！緊來啦！」即種感嘆詞「啊」，拖長音，閣無仝。
(Facebook )
Comments powered by Disqus.