熱心學習台語文个朋友王先生來賜教：『「狗踏碓」的「狗」敢愛變調？若免，是毋是「水淹頷」的「水」嘛毋免？結論：見若「名詞+動詞+名詞」，頭前的「名詞」攏毋免變調？』
根據台日大辭典，變把戲个「狗踏碓」个「狗」有變調：http://taigi.fhl.net/dict/gm.php?fn=A/A0257.png 「水淹頷[tsuí im-ām]」个「水」本調：http://taigi.fhl.net/dict/gm.php?fn=B/B0368.png
原則上，若是講久，予儂當做一个「詞」咧用个，頭前字著愛變調。若是「名詞主語+述語」个句讀[kù-tāu]，著準主語干焦一字，嘛是本調。佇遮主語限定名詞，若代名詞一般攏變調。
若照洪惟仁教授个解說，伊講愛考慮是毋是生語[tshinn-gí]抑是熟語[si̍k-gí]，若是熟語，因為捷講、講久，「詞彙化[sû-luī-huà]」--去，變成一个詞，無閣再是原底个主詞+述語个結構，所以頭前兩字攏變調。我頂日有寫一篇「目孔赤、耳空輕」亦是即種例。
親像「水淹頷」佮「火燒厝」，若就「句法結構」來講，是一模一樣个物件，總是，「火燒厝」卡「熟」，「火」著有變調矣；但是「水淹頷」卡「生」，無變調 ^^
不過，這只是一个角度，閣有其他因素个影響。先勿講三字个，著準是兩字个名詞＋動詞來論，猶原有即个疑問。可比講，「地動[tē#tāng#]」，是自古流傳到tann个熟語，毋過「地」一直攏講本調；顛倒卡新个詞「客滿[kheh-buán]」，是按怎「客」煞來變調？這咁毋是拄好佮頂面所講迄个原理个對逆[tuì-ke̍h]？
若照陳冠學先生个主張，伊是認為「客滿」个「客」必須要比照「地動」个原理，唸本調才著。
總是，在我土激[thóo-kik]，雖然台語每一種調類，攏有本調佮變調，大常會使完全按照句法佮語詞結構去決定咁愛變調。但是佇卡歹決定或者是有寡自由度个少數情形，某一款聲調，比其他个聲調，佇台語母語儂个語感內底，卡無容易保持本調。親像 -h 第四、第八聲著是按呢。頂面个「客」著是 kheh 第四聲。
閣像俗語「頭戴儂个天，跤踏儂个地」(Thâu# tì# lâng ê thinn, kha# ta̍h lâng ê tē.) 我聽過幾若擺，無仝个老輩儂咧講，怹「戴」第三聲無變調，「踏」第八聲有變調。這除了「踏」是 ta̍h 卡無容易保持本調以外，可能嘛牽涉著共款句式，重覆个時，著卡愛變調，無需要像第一遍講个時，講甲遐明。（講本調，聽卡明）
有欲講个例真濟，佇遮閣舉一个心適个，賰个另工才閣寫。咱知影支那个地理形勢普遍是溪水向東爿流去，但是台灣西部卡大，西部个溪水攏是流對西爿，對台灣儂來講，罕得幾時看著有流對東爿个溪仔水，真奇巧，著共迄地頭 號做「水流東[Tsuí-lâu-tang]」，南投、桃園攏有即款地名。毋知看著我即篇个先進，有蹛佇遐附近个無？請問，怹在地儂是按怎講？應該「水」--字是有變調个。汐止[Si̍t-tsí]古名「水轉跤[Tsuí-tńg-kha]」（過去漢字寫做「水返腳」），「水」嘛有變調。但是【漲潮】个台語是「水#轉#[tsuí tńg]」、「水#淹#」；【退潮】是「水#退#」、「水#洘#」、「水#te̍h#」，遮个「水」攏本調。
若俗語「三年水流東，三年水流西」，「水」唸本調，扑算會thong。
教羅个系統，一向無設計本變調个記號，一般通俗个解說講伊是記「本調」，其實毋著，伊記个是「調類」。即種記「調類」个做法，原則上我贊同。總是，我主張一定嘛愛設計另外一款標示本、變調个額外符號，予有需要卡精密來記音个儂有通採用。看著古早个白話字，閣有Kana注音个台語文獻（除了台日大辭典、新版日台大辭典、閣有劉克明个教材），大部份攏無注明本調、變調，有時真正足向望知影古早儂个本變調到底是按怎。
教羅、台羅，一路延續落來，攏無設計出標示本、變調个記號，Gua̋ 苦 :-(
Comments powered by Disqus.