「作弊」个台語音

咱知影科舉時代不時有「作弊」个代誌，「作弊」即个詞漢人自古通行，毋是北京話个專利品。按呢台語按怎唸？

「作弊」阮細漢攏聽囡仔伴講 tsò-piah，但是「弊」佇閩、台語過去个字典文獻、耆老傳承，攏是去聲，現代台語儂按怎會唸做去聲 piah？

因為怹是將「作弊」當做佮「做壁」仝音，「做壁」台語是 tsò-piah，所以「作弊」怹就唸做 tsò-piah。華語「作弊、做壁」是仝音，但是台語即兩个詞無仝音，怹按呢類推是錯誤个。

有受過幾日仔台語漢文教育个儂就袂按呢唸。「作弊」愛唸 tsok-pè（泉腔）抑是「作弊 tsok-pī」（漳腔）卡著。

「弊」照古韻書來反切，會使唸做陽去聲（第七聲）抑是陰去聲（第三聲）兩種調，所以台語古早流傳落來个台語詞「弊」个聲調，偏泉腔無啥一致（泉腔陰去、陽去分卡袂清），像「作弊」是 tsok-pè；但是「弊病」是pē-pīng（「病」唸文言音）。若漳腔就卡一致，攏唸 pī。

「作弊、弊病」即種詞現代台語儂袂曉得，但是古早台語文獻不時出現。台語「弊病」無限定公眾事務，也指個人个缺點。台語「弊」个詞閣有「私弊[su-pè]、弄弊[lōng-pè]、包弊[pau-pè]」，因為台語早就予統治者趕出正式場合，即種正式用語當然現代台灣儂攏無機會傳承著。

白話講「偷看」，但是「偷看」只是「作弊」个一種方法，所以「偷看」袂使取代「作弊」。

作弊代考个儂，台語叫做「槍手 tshiunn-tshiú」，倩槍手代考，叫做「倩槍 tshiànn-tshiunn」，做槍手叫做「做槍 tsò/tsuè-tshiunn」。台語「槍 tshiunn」佮「銃 tshìng」有分。

有友志因為自細漢攏慣勢講 tsò-piah，所以對我所主張「作弊」个音無法度接受，認為我無尊重伊个腔口。

咱會使按呢講：「考試無老實，現代台語口語有講 tsò-piah」，毋過咱袂使講「『作弊」即兩字，台語唸做 tsò-piah」。也就是咱是忠實記錄 tsò-piah 即个音，將伊佮「考試無老實」个意義連結起來，按呢就是尊重活語言，免管漢字。但是無應該講「『作弊』即兩字台語唸做 tsò-piah 是正確个」。

所謂尊重各地个腔口，並毋是完全無分別、無反省，語言文字需要適當个規範化，尤其是台語現此時是一直咧死亡个狀態，其中一个嚴重个現象，就是蓋濟中少年儂，予北京話帶衰著，亂唸亂讀，根本毋知影鄉親序大按怎講。咁講這嘛著用「尊重」个名義，提來教室教、將伊傳承落去？

自然發展个語音，我肯定、尊重。像台語 ji 唸 li；也有唸 gi；像第四、第八聲本調無分，這攏是台語自然个發展，我一直強調愛尊重，袂使定單一標準。但是予北京話帶衰著个個別个字音，毋是叫做「自然發展」，是「人為迫害」个結果，咱著愛以在地原來个發音做基礎，閣適當來規範、修正、傳承。毋是用「民主、尊重」个名義放據在祖先話一直走爭、流失，最後踏入死亡个界線。

用家已有限个生活經驗去決定台語音，彼真危險，因為咱早就是活佇華語為主个世界中。自細漢就hông縛佇學校內受華語教育，轉來厝裡繼續做華語功課，讀課外冊嘛是讀華文冊，頭殼內咧想代誌嘛用華語。按呢算起來，咱一工有幾分鐘久是咧佮純台語儂學習台語？

咱欲復興台語，毋是以個人个生活經驗做標準，是愛全面來收集整理、學習思考咱个父母公祖佮全體台灣先賢个台語資產。

補充：感謝施炳華教授來賜教，伊寫講：
「（宋）吳棫《韻補》有 弊：筆別切，台語切音piat，文白對應 蟹攝開口三等字， iat←→iah 故 piat←→piah，他例如：揭音kiat8，又音kiah8。弊、揭都是蟹攝開口三等字。」

直接揣古音韻書，往往有幾若種又音，有時確實拄好會凍發現其中有一種反切，有合當今个俗音。總是，咱嘛愛對閩、台語本身个流變、文獻、佮耆老相傳，來看「弊」个台語，早年咁有入聲个唸法。若無，我是傾向主張這是現代台語儂个縒音。