信望愛台語客語輸入法 3.0 版發表

今仔日早起，林俊育長老過來台中个台灣本土文化書局，舉辦「信望愛台語客語輸入法 3.0 版」發表會。這是教育部个台語輸入法以外，民間家治募款開發，免費提供予社會大眾利用个台客語輸入法。

有提供 Windows 32位元版、64位元版，嘛有 Mac 版。伊个功能比官方版卡豐富，無論是台語漢字文、客話漢字文、新式台羅、傳統教羅、漢羅合用文，攏總會凍輸入，不止仔利便。使用者會使隨時家治加添新詞條，發行者若有更新詞庫，軟體嘛會自動下載來更新。

軟體佮說明書下載个網址：http://taigi.fhl.net/TaigiIME/

另外，林俊育長老有建置[kiàn-tì]一个「《巴克禮普世版聖經》WikiBible 計畫」，欲將 1933 年巴牧師个白話字聖經，透過網路友志熱心協力，來改寫做現代普通腔个台語。這是話頭說明：http://taigu.fhl.net/announce/