倒手關刀

咱个傳統觀念，輕視使用 left hand，叫做「倒手 tò-tshiú」，left side 叫做「倒爿、倒手爿」；鼓舞儂使用 right hand，叫做「正手 tsiànn-tshiú」，right side 叫做「正爿、正手爿」。英語文化嘛是，right 有兩種意思，表示講「右=正確」。

「倒手、正手」語源雖然有價值判斷个好䆀分別，但是講久了後，就變做中性个用語。

毋過，若是慣勢用倒手个囡仔，就會予大儂叫做「䆀[bái]手仔、䆀手kuainnh、倒手kuainnh」，這就是惡評。

按呢，咱欲按怎自稱家治是慣勢用倒手个儂？咁是講「我是䆀手kuainnh」來自我否定？當然毋是。即陣就講「我是倒手關刀[tò-tshiú-kuan-to]」（前三字攏愛變調）。這嘛會用得講別儂，表示咱無嫌伊用倒手。

台語个死失，有一个現象，就是正常話、好話愈來愈少儂知；賰卡歹聽个留落來。「倒手關刀」已經變做無啥儂知个古早話矣。

咱愛有正確个現代智識，毋通閣強迫倒手關刀个囡仔改用正手，這對怹个成長是足大个傷害！

愛用倒手抑是正手，是先天个頭腦構造个問題，毋通用後天个干涉來禁止伊用倒手。但是會用得鼓舞囡仔兩手攏練，因為多數人類用正手，多數器物、甚至包括文字个設計，攏只是考慮正手儂，無考慮倒手儂个手勢[sì]，所以若兩手攏用會順，生活上卡利便。

藝術家內底倒手關刀比例特別峘。我个藝術才情無培養出來，相信佮我細漢予序大儂強迫改用正手，有連帶關係。哈/唉！

(2012-10-03 facebook)