台語「一」到「十」，除了「七」只有一音 tshit，其他个攏有文言音、白話音兩種講法，生活中攏用會著。文言音是 it、jī、sam、sù、ngóo、lio̍k、tshit(無分文白)、pat、kiú、si̍p；白話音是 tsi̍t、nn̄g、sann、sì、gōo、la̍k、tshit(無分文白)、peh(漳)/pueh(泉)、káu、tsa̍p。
按呢，請問倒踏[tò-ta̍h]時間（華語「倒數計時」）十秒「十、九、八、……、三、二、一」台語愛按怎唸？
因為這佇語文競賽台語文朗讀稿有出現，指導老師面對無仝權威者个無仝主張，毋知欲按怎。
威權教育只容允唯一標準答案个死觀念著愛扑破，而且咱也無應該盲目相信權威，若是盲目相信，一旦兩个權威者有無仝款个主張个時，咁講咱著愛根據佗一个權威「較大尾」來決定欲遵照佗一款主張？XD
重點是以理服人，而且理氣也毋但一條，有時兩條理氣若平有力，按呢就愛包容兩種主張。
倒算計時十秒「十、九、八、七、六、五、四、三、二、一」台語到底愛按怎唸？前八个「十」至「三」較無爭議，唸白話音 tsa̍p、káu、peh、tshit、la̍k、gōo、sì、sann」，但是最後「二、一」有儂愛唸 jī、it，親像駱教授；有儂愛唸 nn̄g、tsi̍t，親像洪教授。不而過，因為洪教授地位較懸，所以咱愛採用伊个？
毋是按呢啦，無論欲用佗一種，攏愛講出一套道理。照我分析，若欲唸 jī、it，就是「倒算第二[jī]秒、倒算第一[it]秒」个意思；若是欲唸 nn̄g, tsi̍t，就是「閣賰兩[nn̄g]秒鐘、閣賰一[tsi̍t]秒鐘」个意思。
看汝認為佗一種分析較肆序，就採用佗一種。以下回應留言開放公投 ^_^
每一个評審看法無仝，而且咱嘛毋知會拄著佗一个評審。比賽是一時个輸贏，追求久長个教育理念較要緊。
補充：嚴格來論，唸 jī 愛寫「二」，唸 nn̄g 愛寫「兩」，nn̄g 是「兩 lióng」个白話音，毋是「二 jī」个白話音。閣來，唸 it 个本字，照稽考是「蜀」，其實毋是「一 it」个白話音，但是社會大眾歹接受即種本字，所以猶原寫「一」，看頂下話句來判斷欲唸 it 抑是 tsi̍t，但是老實講，這定定歹判斷、僫決定，所以台語文作者著愛體貼讀者，佇歹讀个所在補注音標。
2018-08-08 23:00
目前「公投」个結果，有六位贊成唸 sann, jī, it（其中有一位全部唸文言音）；有五位贊成唸 sann, nn̄g, tsi̍t。前--者雖然儂數較濟，毋閣怹無講出啥乜理由，主要是靠直覺，「感覺較順」；後--者雖然儂數較少，毋閣攏有講出怹个理由。
雖然我佇文章內強調著愛以理服人，不而過，講話者个直覺佇現代語言學研究內底是非常看重个，判斷話句正誤个根據。
六位當中，有來自馬來西亞北部（頂馬），福建儂後代 Loke Chin Wei先生，伊寫講：
「若是佇頂馬, 倒反算號頭是真正平常个, 譬論講翕小影个時就會用著, 99.99 pa'sian 个儂唸"sann jī it"... 百姓平常時按怎唸就是著个了, 算講完全無道理嘛是著, 專家攑較長較好个道理出來講嘛是無用...」
咱台灣个問題，就是北京話勢力太大，倒反算號頭一般儂 慣勢講北京話，所致才著阮遮个台語文工作者來參詳看到底按怎唸較妥當。若本來就有約定俗成个一套講法，只要整理記錄起來，當做本土語言个事實智識來教育予下一代就好。
頂馬福建話，怹是確實平常不時咧講 sann, jī, it，所以對咱真有參考價值。毋過，我也著註明一點：怹是連下晡一點、兩點个時間，也講做 it-tiám、jī-tiám（二點）；但是咱台灣是講 tsi̍t-tiám、nn̄g-tiám。所以咱台灣若欲採用 sann, nn̄g, tsi̍t 个講法，佮頂馬个 sann, jī, it 無仝，自成咱个一套系統講法，按呢嘛徛會在。
（本文原來發表佇 Facebook 2015-08-07）
Comments powered by Disqus.