來講兩句台灣古早俗語，關係做戲儂个：
第一句：「無捨施！生囝去粧戲」[bô siá-sì! senn-kiánn khì tsng-hì]
咱知影古早做戲儂，佇社會上無地位。「士農工商」四種儂是良民；「倡優隸卒 tshiong-iu lē-tsut」四種儂是賤民（「倡」本來是指樂師，後來將「賣藝」佮「賣身」个儂合稱「倡」；「優」就是演員），賤民毋但度日艱難，怹个囡孫閣袂使考較做官，永遠袂凍出頭天。所以序大儂若將囡仔送去學做戲，別儂就會講「無捨施！生囝去粧戲」。
「無捨施」、「無捨無施」，即種講法，是咧感嘆講：「唉，哪會遮爾可憐！」，講个儂若有輕視个態度，就變歹意个恥笑。
即句俗語嘛有講「父母無捨施，送囝去粧戲」，解說做「父母無疼惜囡仔，才會送伊去學做戲」。所以以前若有少年儂講欲去學戲，真濟父母會講即句話來反對。
當然，時代無仝矣，當今个藝人，予儂欣羨；但是做野台戲个，猶原非常辛苦、無受重視（除非佮官方關係好，像明華園迄種）。
補充：「捨施 siá-sì」个本義就是華語「施捨」，台語閣有一句俗語講：「偷割稻，捨施糜。」[thau kuah-tiū, siá-sì muê/bê]，就是咧形容假好个儂，就伊做失德得來个金錢，提淡薄仔出來寄付，就欲叫儂肯定尊敬伊。
第二句：「豬食、狗睏、毛蟹行」[ti-tsia̍h, káu-khùn, môo-hē-kiânn]，即句俗語就是咧形容做戲儂不時佇外口奔波[phun-pho]，佇戲台頂、戲棚跤咧生活。食，無飯桌；睏，無眠床。凊彩屈咧就食；倒咧就睏，袂輸是豬狗一般[tsi̍t-puann]个艱苦。
「毛蟹行」正確个解說我無把握，有講是佇戲台頂，愛面對觀眾，所以行路攏行橫个。
有古早味个台灣傳統野台戲，保存真濟寶貴个台語文化佮人生智慧，咱毋但愛扑破以前个士大夫思想，嘛愛拒絕外來政權傷害咱个文化。
(2012-09-26 facebook)
Comments powered by Disqus.