阮細漢對囡仔伴遐學--著，卡奇巧、有鬥句个台語，真濟攏是孽話[gia̍t-uē]，意思卡粗魯，往往是咧罵儂。為著保存語言文化，記錄佇遮，內底亦包括迄陣對電視黃俊雄布袋戲學來个一寡小丑仔白[siáu-thiú-á-pe̍h]，無tsiâu-tsn̂g，有想--著，才閣隨時補充。
一年仔猴，幹石頭。[It-nî-á-kâu, kàn tsio̍h-thâu.]
看一年--个無目地，真siak-phah个話。
矮仔，矮仔，放屎一塊塊仔。[é-á, é-á, pàng-sái tsi̍t-tè-tè-á.]
尾--仔四字个實調，阮唸做 tsit10-te33-te33-a31。
妖道枵sà-sà，放屎糊蠓罩。[iau-tō iau-sà-sà, pàng-sái kô͘ báng-tà.]
iau-sà-sà 我自迄陣到tann，攏想做是咧形容非常「妖」个形，即陣查台日典，才知是咧講非常枵。
因為有咧講究台語，才予我有機會一直回想轉去做囡仔个語言佮生活，得著真濟个感悟佮數念。
即句我是對同學遐聽來个，來源可能是布袋戲个口白。即个同窗，gâu學五仁話[ngóo-jîn-uē]，一箍[tsi̍t-khoo]，伊有時會刁工激一个氣口講tsi̍t-khio，查埔个[tsa-poo--ê]，講 tsa-pio--ê。十幾年後研究台語，我才知影這是一種澎湖腔。阮萬丹遐有一个小地名，叫做澎湖厝，但是即種特殊个腔口，我細漢毋捌聽佗一个大儂講過。
囡仔儂有耳無喙，有尻川袂放屁。[Gín-á-lâng ū hīnn bô tshuì, ū kha-tshng bē pàng-phuì.]
頂半句是真通行个俗語，下半句是囡仔刁工唸予鬥句，作孽講个話。但是這嘛反應出一種反抗精神，袂輸是咧抗議講，我明明有喙，有喙毋予我講話，咁毋是親像我有尻川煞毋准我放屁共款？這是我聽一个叔伯兄講个。
紅關公，白流鼻，烏魚子，走去bih。[Âng Kuan-kong, pe̍h lâu-phīnn, oo-hî-tsí, tsáu khì bih.]
這是一條謎猜[bī-tshai]、囡仔謎（注意「謎」bī 本調第七聲），臆一種果子，答案著是荔枝。這是我佮毋知佗一个囡仔伴，peh上荔枝樹頂，哪挽哪食荔枝，伊共我「考」个。
頂日仔我有問逐家講：華語囡仔歌，「城門城門雞蛋糕，三十六把刀」，是對「城門城門幾丈高，三十六丈高」走音--來个。抑台語有即種例無？即个謎猜著是。我細漢戇戇仔學--儂，即馬才致覺講，原版應該是「紅關公，白劉備[Lâu-pī]，烏張飛[Tiunn-hui]，走去bih。」桃園三結義，三位英雄个三種肉色，配合荔枝个紅殼、白肉、烏籽。囡仔儂，干焦捌一个關公，另外兩位著毋捌囉。
面色紅kōng-kong，血氣袂流通。[Bīn-sik âng-kōng-kong, hueh-khì bē liû-thong.]
即兩句布袋戲丑仔白，到底是意思矛盾[mâu-tún]个，亦是有連貫个話，我到tann閣想袂通。
閣來即句是唸華語，台羅个部份雖是唸台語音，嘛毋tsiânn台語。
大欺小，沒làn-thiâu；小欺大，真偉大。
即擺東京影展个改名事件，咱个陳處長應該愛用即句話共對方江仔平tshiàng--轉去，恁講著毋著啊？
花鰷，食著汝會衰siâu。[Hue-thiâu, tsia̍h-tio̍h lí ē sue-siâu.] tio̍h唸本調。
這是我讀國中，生物課教著【彈塗魚】，老師講彼台語叫做hue-thiâu，台跤有同學著講出即句俗語。花鰷是海邊仔儂才有凍看見，阮萬丹無。因為我是跳區去新園讀國中，遐个同學卡濟討海儂。我一直毋知即句俗語个道理。知影个前輩、朋友，望恁指教，感恩。
Comments powered by Disqus.