分數除法按怎理解？

拄才讀--著，有一位數學家寫伊小五个時，老師教分數除法：8 ÷ 2/3，著愛換做 8 × 3/2 來算，伊問原因，老師應講：Just do it.

伊竟然佮我有完全仝款無好个學校經驗！

但是儂伊迄暗，家己就想出按呢算个道理；我一開始就感覺這完全無法度設想，所以放棄家己思考揣原因，所以伊成功矣，我無。

除法是分配、分割个概念，像 12 ÷ 3，除數是整數來講，有兩種角度來理解分配方式：

一、12 粒梨仔，予 3个儂來分，一个儂會使分著幾粒？4 粒。

二、12 粒梨仔，若是一儂分 3 粒，會使分予幾个儂？4个儂。

但是若是分數除法 12 ÷ 1/3 欲按怎解說？若用以上第一角度，煞變成講「12粒梨仔，予 1/3 个儂來分」，按呢恐怖个畫面，袂自然，歹理解。

較好是用第二角度：12 粒梨仔，若是一儂分 1/3 粒，會使分予幾个儂？因為一粒就可以切做三个 1/3，所以一粒就會使分予三个儂，按呢總數有 12 粒，就是三个儂个 12 倍，12 × 3 = 36。

所以 12 ÷ 1/3 个結果就是 12 × 3。但是 12 ÷ 2/3 欲按怎理解？

本來是一个儂提 1/3 粒，今變做一儂加提一倍，2/3 粒；按呢，本來會使分予 36 儂，就變只有夠分予一半儂，36 ÷ 2 = 18 个儂來分。

所以 12 ÷ 2/3 个結果就是先 12 × 3 了後閣除以 2，也就是 12 × 3/2。

佇計算个操作上，分數除法，外形上就變做是用「乘以倒數」个方式。但是這若無經過類似以上說明个方式，直接叫學生死記形式个操作，實在是無負責任，將儂當做機器个數學教育。