剃頭業个僻話 tsâng、lui

尾晡仔去剃頭，頭家娘共我鉸到一半个時，一對爸囝儂客入來。開講一下仔了後，頭家娘怹查某囝叫其中迄个查晡囡仔坐起去我隔壁位，準備欲共伊剃个時，頭家娘共查某囝講：

【汝先來 tsâng，我 lui 較緊。】（lui 講本調）

怹兩个是咧講僻[kóng-phiah]，【僻】就是【僻話 phiah-uē】，也就是行仔內个祕密話，無愛予外儂知影怹咧講啥。但是我聽有！

伊就是欲趕緊共我鉸予好，換手予怹查某囝來共我洗頭，tsâng 就是「洗」，tsâng-suann 就是「洗頭」；按呢伊才過去共迄个囡仔鉸，lui 就是「剃、鉸」，lui-suann 就是「剃頭、鉸頭毛」。查某囝無伊剪頭毛遐熟手，伊按呢扑派，工課才較有效率。

我知影伊急欲結束我即爿，所以就緊吩咐伊講，頭前閣鉸較短咧。這是我个慣勢，無愛額頭有頭毛佇遐鑿[tsha̍k]，但是逐擺剃頭店攏會留傷長，因為按呢捋起來較好看。

三點小感想：

1. 講僻个目的，就是無愛予外儂知影怹內部參詳代誌个過程。

2. 佳哉我有食半暝糜，讀過台語文獻，知影剃頭業个一寡用語，也有去印證過。佇即个無料想著个機緣，我个台語智識發揮功效，會曉緊開喙要求著較滿意个服務，哈！

3. 我有真濟台語話，是佇北部、中部學个，過足濟年，才佇屏東故鄉聽著阮鄉親原來也有按呢講。

以前我就有寫過一篇〈剃頭業个僻話〉。

迄當時，干焦知影 lui22-suann33、tsang22-suann33（用三階制寫法記實調），毋知 lui 佮 tsâng 會使單獨用做動詞，所以也毋知 lui 个本調是第一聲，tsâng 本調是第五聲。毋過當時是記實調，知--之為知--之，不知為不知，無硬轉做調類來記，所以也佳哉無傳播著走爭个台語智識。

補充：

一、剃頭僻話个 tsâng 佮日常話動詞个 tsâng 無仝：

1. 主要意義無仝：一个是【洗】，一个是【沖】。
2. 語言風格無仝：一个是僻話；一个是日常話。
3. 通行地區無仝：僻話 tsâng 敢哪通行全台灣个剃頭界，但是日常話 tsâng 有个所在講 tshiâng，像阮屏東就是按呢。

僻話 tsâng 个語源到底是毋是日常動詞 tsâng？這愛閣稽考，總--是咱愛先明辨以上三點差異。

二、剃頭僻話个 lui 佮日常話動詞个 lu 無仝：

1. 韻母無仝。
2. 意義無仝，lui 是運用各種家私頭仔來剃頭、來鉸頭毛；lu 是專指用攄仔 攄[lu]。
3. 語言風格無仝，lui 是僻話、祕密用語，剃頭師傅袂用來佮儂客溝通；lu 是日常用語，師傅佮儂客定定講著。

僻話 lui 到底是毋是對日常動詞 lu 變化韻母才變做癖話？這愛閣稽考，總--是咱愛先明辨以上三點差異。

註：台語「有食半暝糜」是套語，意思類似「三更燈火五更雞」，用來比喻奮發用功，認真到半暝。