創世記 2:7 台語聖經兩版本比較

馬雅各版（1884）：
Iâ-hô-hoa Siōng-tè chhe̍k-thô͘ chhòng-tsō lâng, pûn-khì ji̍p-phīⁿ, lâi chiâⁿ hiat-khè e5 lâng.

（耶和華上帝chhe̍k塗 創造儂，歕氣入鼻，來成血氣个儂）

巴克禮版（1933）
Iâ-hô-hoa Siōng-tè ēng tōe-chiūⁿ ê thô͘-hún chhiau chòe lâng, pûn oa̍h ê khì ji̍p i ê phīⁿ-khang, lâng chiū chiâⁿ-chòe oa̍h ê lêng-hûn.

（耶和華上帝用地上个塗粉chhiau做儂，歕活个氣入伊个鼻空，儂就成做活个靈魂。）

前一版敢哪是是歷史家个筆法，後一版敢哪是文學家个筆法。

比對一寡章節，我發現馬雅各版主要是按照「委辦譯本」个文言漢文版，二手翻譯做閩台語，從中，唐儂漢文先生參與白話字聖經翻譯个影響有偌大，無清楚。若是巴克禮版，有直接參考希伯來原文。莫怪馬雅各版話句加足簡省，總頁數自然就較少。毋閣巴克禮版也有受華文官話和合本影響。

委辦譯本：『耶和華上帝摶土為人，噓氣入鼻，而成血氣之人』。

Uì遮 thang知，巴牧師無滿意舊版台語聖經，欲愛重譯，究真是對「委辦譯本」个不滿。

照我目今所看，馬雅各版、巴克禮版攏有受中文聖經影響，或者是文言本，或者是官話本，又且主譯者是外國儂，各種因素加起來，欲將起頭兩phō白話字聖經看做當時閩台語百姓話个實相，會有風險。

總--是，白話字聖經對咱欲學習、掌握台語，猶原有足大个啟發性。舉例像「主題提前」个句式，佇馬雅各版大量出現，大大超過原文佮中文版，也超出巴克禮版，即點我扑算不止thang代表閩台語个特色。